#ZabilianZ July 04: Myanmar ram, Chin State, Falam township huam chhunga mipui sipai ve ve - Chin National Defence Force (CNDF) leh Chinland Defense Force (CDF)-Hualngoram te inkahnaah CDF-Hualngoram sipai Lalliandinga a thi.
CNDF leh CDF te hi tun thla ni 2 khan an inkap a. CDF-Hualngoram thupuangtu chuan CNDF ten tunhma atangin an thunun bial chhungah camp an siam nia sawiin, Satawm leh Lianhna khua te drone hmanga an beih avanga he inkahna hi thleng ta niin a sawi a. CNDF lamin an sipai te zin, Tuichirh khuaa an chawlh laiin tun thla ni 2 khan CDF lamin hual beta an kah avanga he inkahna hi thleng zui ta niin an sawi ve thung.
Thudawnna pakhat chuan Falam township huam chhunga Hualngoram inchuhna avanga he inkahna hi thleng niin a sawi a. Satawm, Lianhna leh Tuichirh khuaah te inkahna a thleng nia sawiin, he inkahna avang hian tualchhung mi te chu Mizoram lam Zokhawthar-ah an raltlan a, Indo-Myanmar border gate pawh Assam Rifles-in fimkhur thuah chawpchilh takin an khar ve bawk a, ramri kana school kal thin naupang te, damlo leh tar chaklo ten harsatna an tawh phah nasa hle niin a sawi bawk.
CNDF leh CDF-Hualngoram te hi ramri chungchanga an thu a inhmuh loh avangin kumin June ni 16 khan CDF hotu ten Hualngoram-ah emergency an lo puang tawh a ni.#zabilianz #zabilianznews #zofatehuapzo
0 Comments