#ZabilianZ July 05: Lok Sabha MP Richard Vanlalhmangaiha'n tukin khan Association for Voluntary Blood Donation (ABVD) hnenah Blood Donation Bus a pe a, AVBD hruaitute chuan he bus hi Aizawl Civil Hospital Blood Bank-in a hman turin an ruahman a ni.
MP fund Rs. nuai 18 hmanga lei Blood Donation Bus (Tata Winger, 12 seater), ABVD hnenah a hlanna ah hian Lok Sabha MP Richard Vanlalhmangaiha chuan a thlawna thisen pek chu Kristianna leh tlawmngaihna lan chhuah tir na atana chhawmnun zel tha a tih thu a sawi a. Helama thawktute pawh midang nun chhanna atana rawngbawlna tak tak a ni tih hre renga theihtawp chhuah zel turin a chah bawk.
AVBD President C. Lalnunnema'n Richard Vanlalhmangaiha chu MP a nih hlimah Blood Donation atana hman tur Bus an mamawh thu thlenin, MP fun atanga pe turin an dil a, a lo remtihsak nghal tih a sawi a. "Mizoramin MP a neih tawh zingah MP fund atanga Blood Donation Bus min pe hmasabertu a ni" a ti.
Kum 2007-ah hetihlaia Lok Sabha MP Vanlalzawma'n hma a laksak avangin Hindustan Petroleum Corporation Ltd (HPCIL) CSR atangin Blood Donation pualin Mini Bus an dawng tawh tih AVBD President chuan a sawi a. He mini bus hi Civil Hospital, Aizawl-a Blood Bank-in kum 18 chuang tangkai taka an hman hnuah Blood Donation Bus thar an dawng leh ta chu lawmawm an tih thu a sawi bawk.#zabilianz #zabilianznews #zofatehuapzo
0 Comments