Aizawl Dy. Mayor-in MHIP member te hma ah ngaihdam a dil

#ZabilianZ July 05: Aizawl Dy. Mayor R. Thanglura'n a bial Ward XII-a  Tuikual South-ah vawiin khan MHIP Day hmanpuiin, "kum sawm Ward Corporator nia khawtlang tana kan thawhhonaah in duhkhawp ang ka lo tlinglo a nih chuan MHIP Day-ah hian in mi ngaihdam ka dil a ni," a ti.#zabilianznews

Dy. Mayor chuan 'Engtin nge ni ang?' tih chu Mizorama nuho zawng zawng ngaihtuahnaah riak se a duh thu a sawi a. Nitin ruihhlo thahnem tak man thawm awm reng te, khawlai dunga ruihhlo avanga harsatna tawk fuankhawm hmuh tur a awm thu sawiin, chhungkaw nu zawng zawng ten 'engtin nge ni ang' tia a tuamdam hna thawh theih dan tur leh ruihhlo laka an tu kan fa te an him theih dan tur ngaihtuah turin a ngen a ni.

Aizawl Dy. Mayor huan "Kan ngaihhlut zawng kan thlak a tul" tiin, MHIP member kalkhawm te chu "kan tu leh fa te, kan chhungkua theuh leh kan hnam hmakhua atan in theihna a thara hmang turin ka ngen che u a ni" a ti a. Faina leh thianghlimna kawngah pawh mahni in chhung theuh atanga a hma la thar a, thianghlimna kawnga hmahruaitu ni turin a chah bawk.

Tuikual South-a MHIP Day lawmna hi an President Zonunsangi'n kaihhruaiin, MHIP General Hqrs. President thuchah chhiarchhuah a ni a. MHIP thuthlung sawi rualin, nikum MHIP Day leh kumin MHIP day inkara an member chatuan ram pan ta mi 14 te sunna hun an hmang a. An member term thum lai Local Council member atana thlan tlin tawh Lalsangzuali Ralte hnenah chawimawina thuziak leh puanchei hlanin, an member kum 70 tling chin te hnenah thilpek an hlan bawk a ni.

Tuikual South Local Council, Branch YMA , Branch MUP leh Games & Sports Association hruaitu ten MHIP Day hi an hmanpuiin, thu an sawi bakah MHIP Day lawmpuina an hlan theuh bawk.

MHIP Day hi July ni 6 ni mahsae, he ni hi Pathianni a nih avangin MHIP branch engemawzat chuan vawiin khan MHIP Day hi an hmang a ni.#zabilianz #zabilianznews #zofatehuapzo