ZPM party thupuangtu-in Congress party thupuangtu leh midang te a chhang

#ZabilianZ July 29: ZPM party thupuangtu K. Laltluangkima'n Congress party thupuangtu Dr. Lallianchhunga'n sawrkarin sawhthing a lei khawlsa Sairanga a dah te a tawih a awm nual nia a sawi chu hralh tlak leh hralh tlak loh thliar hnua a tha lo zual an paih te niin a sawi.

Vawiin khan ZPM party thupuangtu chuan Aizawl Press Club-ah thuthar thehdarhtute kawmin, sawrkar hmalakna hrang hrang a sawifiah a. "Congress leh MNF te kum 17 leh kum 20 an sawrkar chhung khan heng party lian pahnih te hian sawhthing tawih kan paih zat pawh hi an lei lova. Chuvang min lo sawisel hmanhmawh lo ula, kan tih tihin kan han ti anga, sawhthing-ah kher kher hi chuan ZPM hi chu lo sel lo teh u, kan veina hi a rei tawh em mai!" a ti bawk.

Party dang ten sum lengvak a tlem nia an sawi thin chu ZPM thupuangtu chuan a dik a rin thu sawiin, zu, drugs, kuhva leh dan lova lo lut te nasa taka tihtawm a nih avangin miin sum chuang bang an nei tawh lo niin a sawi a. "Contract atanga percentage hauh thin sawrkar hnathawk tam takin an hauh thei tawh lo" tiin, "a thlawna sem a awm tawh loh avang leh miin an thawh hlawh chiah chiah chauh an lakluh tawh avangin sum kan renchem thiam tan a, alothlawna sum tualleng a lo vang a nih pawhin hmasawnna lam a ni" a ti.

ZPM thupuangtu chuan 'MNF-in Fisheries Deptt. pawisa nuai 100 awmna sawrkar an zawt' tih tualchhung chanchinbu-ah a lang nia sawiin, Rs. nuai 100 ni lovin Rs. nuai 1000 a nih thu a sawi a. "Ni 25.4.2025 ah sanction hmuh a ni a, budget allocation dil a ni a. Ni 27.5. 2025 khan expenditure sanction dil leh mek a ni" a ti a. Reserve Bank of India-in him takin an kawl mek" tiin, bothlau a awm lo niin a sawi.

Chief Minister Car man chungchang pawh ZPM thupuangtu chuan sawiin, "Kan CM hian inthlan hma khan, “ZPM Chief Minister chu car man to ah a thu dawn lo” a ti a nih kha. ZPM chuan CM chu kan han nei ta a. CM hlui car a chhawm a. A car chhawm hi kum 15 vela upa tawh, repair reng ngai a nih tak avangin CM chu car thar Toyota leisak a ni" a ti a. CM car thar man chu Rs. nuai 20 vel atanga intanin chi hrang hrang a awm thu leh a to pawl chu nuai 32 vel a nih thu sawiin, "hei hi tunlaiah chuan state khat CM chuanna atan chuan car pangngai mai ni a, mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni" a ti bawk.

Siaha bialtu MLA Dr. K. Beichhua-a'n “MUHCS laimu atan ABPMJAY rinchhanin he Health Care hi siam a ni tih tunah chuan kan chiang tawh a,” tia a sawi pawh chhangin, ZPM thupuangtu chuan MUHCS chu ABPMJAY laimu emaw a kungpui ber emaw a ni lo niin a sawi a. "A zar peng tiin sawi ta zawk ila a dik awm e" tiin, ABPMJAY ai chuan MUHCS in a huam zau zawk hle niin a sawi bawk a ni.#zabilianz #zabilianznews #zofatehuapzo