#ZabilianZ Aug 28: Congress party-in ZPM-in December 2023-a sawrkarna an chan atangin kumin June thla thleng khan Rs. vbc 6214.27 an puk tawh niin an sawi a, "kum khatah vaibelchhe sangthum chuang an puk tihna a ni" an ti.
Mizoram Pradesh Congress Committee (MPCC) chuan Chief Minister Lalduhoma kaihhruai sawrkarin sum a puk tawh zat chu RTI hmanga an zawhna Finance departmenrt-in a chhan dan a nih thu an sawi a. ZPM sawrkar hnua leiba zat Rs. vbc 500 tih chu RTI hmanga an zawhna chhanna chuan a dik lo tih a tichiang niin an sawi bawk.
Comptroller and Auditor General (CAG) of Iindia-in Mizoram sawrkar sum dinhmun thlatin a tarlan thinah kum 2024-2025 chhungin Rs. vbc 3,133.45 puk a nih thu MPCC chuan an sawi a. "Budget-a puk an tum chu Rs. vbc 1,365.70 a ni a, an puk tamna hi 229.44% lai a tling a ni" an ti.
Congress party chuan "kum 2025-2026 budget-ah Rs. vbc 1,651.68 puk turin an in budget a, June thla thlenga CAG report tichhuah tawhah Rs. vbc 1,178.53 lai an puk tawh a, thla thum chhungin an puk tum zat atanga za-a 71.35 lai an puk tawh a, an puk hnem leh dawn hle a ni" an ti bawk.
MPCC chuan hetianga sawrkarin sum a puk chho zel a nih chuan term khat chhungin, Rs. vbc 15,000 chuang an puk thei dawn niin an sawi a. "Tuna kan leiba hi 2024-2025 budget-a a lan danin Rs. vbc 14,034.76 a ni a, hetiang zela an puk chuan kum 40 lo sawrkar tawh ten kum 40 chhunga an bat aiin ZPM sawrkar-in kum 5 chhunga an puk hi a tam thei dawn tihna a ni" an ti a ni.#zabilianz #zabilianznews #zofatehuapzo
0 Comments