#ZabilianZ Sept. 02: Supply Minister B. Lalchhanzova'n vawiin khan Sairang Rel Station leh Sairang Dinthar-a FCI Kudam sak mek bakah Supply Kudam sak mek te a tlawh a. Sairang leh a chhehvela hmasawnna hmuh tur awm chho mek te chuan a ṭha zawnga ram ei leh bar a nghawng a beisei thu a sawi.
Sairang rel station-ah hian passenger phur chi rel platform leh bungraw phur te platform siam hran a ni a. Bungraw phur rel chawlhhmun peihfel thawkhat a nih laiin, mipui mamawh bungrua an rawn phurhluh te lo dah lailawkna tur lam erawh buatsaih a la ni lo thung a, a lo ziahfelna tur lam counter erawh ruahman ni mahse, hei pawh hi peihfel a la ni lo bawk a ni.
B. Lalchhanzova chuan hmasawnna lo awm chho mekin vantlang nun a nghawng dan tur pawh inzir lawk chunga lo inbuatsaih a ṭul thu pawh a sawi a. "Hmasawnna hnathawh lian tak tak ten a ram mi tribal mipuite a nghawng dan hi Ministry of Social Justice & Empowerment chuan a ngaipawimawh em em a, Sairang chhehvela hmasawnna hnathawhte pawh hi kan sawrkar chuan uluk takin a enzui reng a ni," a ti bawk.#zabilianznews
Sairang leh a chhehvela hmasawnna hna thawh mek te chu mipui ei leh bar nghawng thil a nih avanga tlawha enfiah a nih thu Supply Minister chuan a sawi a. Sawrkar chuan hna ṭha leh zo rang, mipui ten an chhawr thuai a duh ber tih a sawi.
Supply Minister lo dawngsawngtu Railway lam hotute chuan Sairang rel station chu hawn theiha an peih tawh thu sawiin, September ni 13, 2025-a hawn a nih rualin passenger phur leh bungraw phur chi te pawh an service tan nghal dawn niin an sawi bawk.#zabilianznews
Ruahman lawk ang chuan Bairabi leh Sairang inkar rel kawng thar hi tun thla - September ni 13, 2025-ah Prime Minister Narendra Modi-a'n a hawng dawn a ni.
Supply Minister hian Sairang Dinthar-a FCI kudam sak mek pawh tlawh nghalin, hnathawktu ten an thlen chin te a enfiah a. Hnathawktu ten an sawi danin FCI kudam hi kumin kum tawp lamah emaw kumthar tir lamah emaw chuan peihfel hman an inbeisei a ni. FCI Kudam bul maia Supply kudam sak mek pawh pahnih chu peih thawhkhat tawh a ni a, pakhat dang rel mek a ni bawk.#zabilianz #zabilianznews #zofatehuapzo
0 Comments