#ZabilianZ Oct 22: Chengkawlawn Run, Sakawrdai-a YMA inkhawmpui lian neih meka rorel palai ten kum 2025 - 2027 chhunga YMA kumpuan atan 'Ruihhlo Do' an thlang.
Vawiin khan CYMA President Lalhmachhuana kaihhruaiin YMA inkhawmpui lian palai mi 1506 ten Chengkawlawn Run, Sakawrdai-ah ro an rel a. Kum 2025-2026 chhunga CYMA budget ruahman Rs. 21,149,935 an pawm a. Kum 2027-a YMA inkhawmpui lian chu Vairengte Joint YMA-in a thleng ang.
YMA inkhawmpui lian palai te chuan tun aia khauh leh awmze neia Inner Line Permit (ILP) kalpui a nih theihna tura sawrkar-a thlen rawtna pawh an pawm a. Tui hnar humhalh dan siam rawtna pawh pawmin, "Mizorama inkalpawhna kawngpui te a chhiat avanga mipui tana harsatna thleng tiziaawm turin tun aia chakin Mizoram sawrkarin hma la rawh se" an ti bawk.
Mizorama hnamdang sumdawng, phalna nei lo tam lutuk titlem tura hmalak rawtna pawh YMA inkhawmpui palai te chuan an pawm a. Mizo hmeichhia ten hnamdang pasala an neih zel loh na tura nasa zawka inzirtirna kalpui rawtna te, YMA inkaihhruaina leh nihphung leh hruaitute mawhphurhna rampuma inzirtir rawtna te, Mizo infiamna te chawisan an nih theihna tura hmalak rawtna te leh Zohnahthlak chi peng hrang hrang Mizorama chengte zingah chi bil hmalakna a awm tawh loh na tura hmalak rawtna te an pawm bawk a ni.#zabilianz #zabilianznews #zofatehuapzo
0 Comments