#ZabilianZ October 01: Larsap General VK. Singh-a'n vawiin khan Sairang Railway Station tlawhin, a enfiah a, railway hotute a kawm bawk.
Larsap chuan Indian railway network nena Mizoram khawpui Aizawl thlunzawm a ni leh India ram khawpui pawimawh tak tak te awlsam taka rel hmanga thlen theih a ni ta chu lawmawm a tih thu a sawi a. Northeast Frontier Railway hotute chu a enkawl leh tihchangtlun zelna turah theihtawp chhuah turin a chah.
Rel service mumal leh khailhlak lo, mipui tana awlsam leh him, faina leh kawng tinrenga ram chhung hmun dang te entawntlak siam kawngah theihtawp chhuah tlan a tul thu Larsap chuan a sawi bawk.
Railway Deputy Chief Engineer Harjimal Meena-a'n Larsap chu Sairang Railway Station chungchang lo hrilhfiahin, Area Manager, Badarpur Virendra Kumar Meena-a'n hmalakna leh hriat tur pawimawhte a lo hrilh bawk a ni.
Rs. vbc 8,071 senga siam - Bairabi - Sairang rel kawng - km 51.38 a thui chu September ni 13, 2025 khan Prime Minister Narendra Modi-a'n a hawng a. Hemi rual hian rel service pathum - Sairang - Delhi (Anand Vihar terminal) Rajdhani Express, Sairang - Guwahati Express leh Sairang - Kolkata Express te vailiamin, Mizoram khawpui chu India Rail network nen a vawikhat nan thlunzawm a ni.
Bairabi - Sairang rel kawngah hian leiverh 48 (km 12.85 a thui), lei (bridge) - major 55 leh minor 87 bakah Railway station 4 - Hortoki, Kawnpui, Mualkhang leh Sairang te a awm a ni.
0 Comments