ZPM candidate Pu Vanlalsailova hi Congress tan a hnawk lo, a tan chuan ZPM party hi hling an ni :John Rotluangliana

#ZabilianZ Oct. 10: Dampa bial bye-election lo awm tura Congress party candidate John Rotluangliana'n kum 2023 MLA inthlanah thalai ten ZPM boruak an pu darh a, Dampa bial bye-election boruaka Congress party zawmtu tam ber leh Congress party boruak pudarhtu chu thalai te bawk an ni leh ta thung niin a sawi.

Dampa biala khaw hrang hrang - Saithah, Phuldungsei, Parvatui leh Lallen te a tlawhnaah he thu hi John Rotluangliana chuan a sawi a. Mizoram hmun hrang hrangah mipuiin ZPM sorkarah beiseina an nei tawh lo nia sawiin, an thutiam hlen si loh sawimam chu ZPM sorkar hmalakna awmchhun niin a sawi bawk.

Congress sorkar thuai thuai tura duhtute phone call chhangin a hmanhlel niin John Rotluangliana chuan a sawi a. "A bul tan nan Dampa bialin Congress an kova, Dampa bial hi Pathianin Congress party te ram rawngbawl hna bultanna tur atana min pek a ni tih hi kan pawm thlap a ni, a ti.

ZPM candidate Vanlalsailova chu Congress tan a hnawk lo nia sawiin, "a tan hian ZPM party hi hling an ni" a ti thung a. MNF party pawh tunhnaiah Zoramthanga a hlim thar lutuk chuan headquarters leh Dampa biala an candidate Dr. R. Lalthangliana bakah an party nasa takin a tihnual niin a sawi.

MPCC Vice President ni bawk John Rotluangliana chuan "Congress a sorkar apiangin ram rohlu kan neih belh" a ti a. Mizoramin a neih Mizoram rohlu chu Congress party hmalakna vek nia sawiin, "ZPM leh MNF hmalakna Mizoram kan hmuh chu thlalak chauh a ni" a ti bawk.