#ZabilianZ Nov 09: Dampa bial bye-election lo awm tura BJP candidate Lalhmingthanga'n thlan tlin a nih chuan Dampa bialin hmasawnna thil thar an hmu ngei dawn niin a sawi.
West Phaileng Dinthar kawna street campaign-ah nimin khan he thu hi BJP candidate chuan a sawi a. Kum 18 vel lai Dampa bial tan a lo vakvai tawh nia sawiin, "kan bial hi pawn lam mi ten sum siam nan mai maia an hman kan phal tur a ni tawh lo" a ti.
Lalhmingthanga chuan "kan mamawh te min pe theitu te ngeiin kan kawtlaiah min rawn kalchilh hi bial tana hmasawnna thlen theihna tur, central sawrkar nena inthlunzawmna hun tha a ni" a ti a. A candidate pui te chu Union Minister hmuh pawh thil harsa tak a ni tih hrechiangtute an nih thu sawiin, bial chhung mi diktak in an bial tana hmasawnna hna an chhawp te a taka an chen theihna tura vote theuh turin bial mipuite a ngen bawk.
Palak bialtu MLA K. Hrahmo pawhin thusawiin, Dampa bial mipuite chu "kum 3 chhung BJP min enchhin turin kan ngen che u" a ti a. Tuna sawrkar term chu kum 3 chauh a awm tawh avangin hemi chhung atan hian BJP candidate lo vote theuh turin a sawm a ni.
K. Hrahmo chuan "ZPM hian MLA an mamawh belh lova, MNF leh Congress party te lah state-ah leh central lamah opposition party an nih bawk avangin central sawrkara kan bial mamawh te sawi chhuak tur chuan BJP MLA kan neih ngei a pawimawh a ni" a ti a. "BJP a inpek kher pawh ngai lovin, kan bial hmasawnna atan BJP candidate Pu Lalhmingthanga lo vote theuh turin kan ngen in kan sawm che u a ni" a ti bawk.#zabilianz #zabilianznews #zofatehuapzo
0 Comments