#ZabilianZ Apr 23, 2026: Mizoram Board of School Education (MBSE)-in vawiin khan HSLC exam 2026 result chu a tichhuak a, tuntumah hian kalphung thar hman niin, result bu-a a ti tha zual tarlan thin te, mark hmuh zat tarlan thin te, an pass na division tarlan thin te kha tarlan a ni ta lo.
St. Joseph Higher Secondary School zirlai Rachel Biakṭhapari, East Lungdar chu tuntum HSLC result chhuakah hian mark hmu sang ber nia hriat a ni a, full mark 500-ah mark 480 a hmu. HSLC 2026 exam-ah hian zirlai (regular) 17963 leh private-a exam 294 an awm a. 18257 niin, heng zinga 8448 te chu mipa an ni a, hmeichhia 9809 an ni.#zabilianznews
Zirlai (regular) 14517-in an pass-a, private-a exam 146-in pass-in, tuntuma HSLC pass zawng zawng 14663 an ni a, exam zawng zawng atanga za-a 80.31 in an pass a, compartmental chance nei 117 an awm bawk.
Sorkar school zirlai za-a 72.07 in an pass laiin, private school zirlai zaa 89.38 in an pass a. Deficit school zirlai zaa 96.92; Aided school zirlai zaa 72.66; Lumpsum school zirlai zaa 77.47 bakah private-a exam zaa 49.66 in an pass a ni.
HSLC exam 2026-ah hian zirlai exam pass vek scool 146 an awm laiin, zirlai pass nei lo school 13 an awm bawk.
MBSE Chairman chuan "board exam result atan chauha zirlai zir lawk vak vak ang kha awm lo se kan duh ber" tia sawiin, naupangteah result tha nei tura innawrna nasa thin lutuk tihtlem an duh bawk niin a sawi a. "Zirna sang zawk an zir dawnin, HSLC top 10 an nihna leh an pass na division ni lovin NEET, JEE leh CUET-ah te entrance exam result zel an en tawh avangin chutiang atan chuan thiamna tak tak nei zawk se kan duh a ni" a ti bawk.
Zirnain hma a sawn zel theih nan question pattern pawh tihdanglam zel tum a nih thu pawh MBSE Chairman chuan sawiin, compartmental chance nei zirlai 117 ten an kal zelna tura admission an tlai loh na tura compartment exam buatsaih thuai tum a nih thu leh HSLC result complaint hun ni 7 chhung hawn a nih tur thu a sawi bawk a ni.#zabilianz #zabilianznews #zofatehuapzo
0 Comments