#ZabilianZ Apr 28, 2026: Hun engemawchen Covid19 kai Mizorama an awm tawh loh hnu ah tunhnaiah kai thar an awm leh ta nual a. Integrated Disease Surveillance Programme (IDSP) National Health Mission, Health & Family Welfare Department chuan he natna laka fimkhur turin mitin te an ngen.
IDSP-in a tarlan danin, Covid19 vei mek 8 an awm nia sawiin, Mizorama Covid19 test tawh zat 19,98,442 a ni a, positive hmuhchhuah tawh zat 239710 niin, thihpui tawh zat 734 leh enkawl dam tawh 238968 an ni.
He natna lan chhuah dan tlangpui an tarlan danin -
Luna, taksa na, sil themthum , ruhna leh chau, thawhah, hritlâng, khuh leh hrawk na te an ni.
A inkaidarh dân - mihring leh mihringah - khuh leh hahchhiau leh kuta thil khawih atangin.
Fimkhur ngai zualte -
Raipuar, nausen, kum upa lam leh natna benvawn nei te, hun rei tak chhûng damdawi hmanga inenkawl ngai te an nih thu IDSP chuan a tarlang a.
Invênna - tih loh tur te -
Puipunna hmuna awm tam loh, mit, ka leh hnar te khawih loh tur, midang nen kut leh kut invawn/inchibai loh; mahni rinthua damdawi ei loh tur te a nih thu an tarlang.
Hmui leh ka te, khuh leh hahchhiauin inhup thin tur a ni a, sahbawnin kut fai taka sil thin tur a ni, thil tuiril in tam tur, hritlang khawsik neih chuan midang te hnaih lova awm, loh theih loh a nih pawhin face mask hman thin tur a nih thu te an tarlang bawk.#zabilianz #zabilianznews #zofatehuapzo
0 Comments