#ZabilianZ Apr 27, 2026: Aizawl Municipal Corporation (AMC) inthlan vote tla te chu vawiin khan tluang taka chhiar zawh a ni a. Ward 19 awmah ZPM-in ward 17 lain, AMC-a rorellai MNF leh INC-in ward khat ve ve an la bawk.
Ward no. IX-ah a bialtu nilai, MNF candidate B. Lalawmpuii chu a zawna a vawithumna atan thlan tlin leh a ni a, ward no. XIX ah MPCC Treasurer nilai Dr. Lalmalsawma Nghaka chu thlan tlin a ni bawk.
ZPM Media Chairman B. Lalchhanzova chuan vawiin vek khan thuthar thehdarhtute kawm nghalin, ZPM candidate te thlang tlingtu mipui hnenah lawmthu a sawi a. AMC mitin banphaka siam chu an hna hmasa tur a nih thu leh hemi atan hian mobile application leh AMC community help desk siam a nih tur thu a sawi.
B. Lalchhanzova chuan an party election manifesto chu road map-a an hman tur thu sawiin, manifesto zawng zawng ngaihpawimawh vek tur a nih rualin, hmalakna hmasa tur te an duan thu a sawi a. AMC-in mipui aṭanga sum a khawn hrang hrang te langtlang taka hman a nih tur thu te, hmuh zat leh hman zat te mipui hriattir a nih dawn bakah, mipui chhawr ṭangkai theih tur zawnga a hmanna ruahman a nih tur thu a sawi.
AMC area chhung ni si, PHE connection la nei ve lo te tan a kaihhnawih department nen ṭangruala tui thianghlim pek thuai tum a nih thu pawh a sawi a. Aizawl khawpuia vawk vulh khapna dan ennawn a nih tur thu te, zirchianna ṭha zawk leh ruahmanna ṭha zawk siama vawk vulha eizawngte tan ruahmanna siam a nih tur thu te a sawi.
AMC-in Finance Commission Grant a dawn ṭhaṭ theih nan Own Source of Revenue (OSR) neih ṭhaṭ a ṭul thu sawiiin, AMC OSR siam thei tur asset lian (mipui chhawr theih tur ni si) siam kawngah hmalak a nih tur thu pawh B. Lalchhanzova chuan a sawi a. In chhawng tin/floor tinin LSC ang chi an neih theih na tura hmalak a nih tur thu leh hemi dan hi Assembly a putluha, remtih a nih hnu-ah AMC in a umzui tur a nih thu a sawi bawk.#zabilianz #zabilianznews #zofatehuapzo
0 Comments