Chief Minister-in ram leilung tichhe tam lo zawng leh a hralhna hlawkpui zawk thei turin sawhthing-ah organic uar tul a ti

#ZabilianZ May 16, 2026: Samthang khawtlangin Sawhthing Kut an buatsaih chu vawiin khan Chief Minister Lalduhoma'n hmanpuiin, sawhthing chu ram leilung tichhe tam lo zawng leh a hralhna hlawkpui zawk thei turin organic uar a tul thu a sawi.

Chief Minister chuan processing pawh kalpui a tul thu sawiin, "kan inbuatsaih chho zel", a ti a. Mizoram sawhthing quality a that thu sawiin, "damdawi anga hman theih a ni a, essential oil a ngah a, fibre a nei tlem a, Ministry of DoNER-ah Unique Selling Proposition (USP) min kalpui turin kan dil a, min rawn phalsak a ni" a ti.

USP - Sustainable Cultivation & Value Chain Management Project an siam thu Chief Minister chuan sawiin, project cost Rs. vbc 190 vel a nih thu a sawi a. "Processing unit dinna tur Rs. vbc 30.13. kan ruahman a. Tun Nilaini liamta khan a DoNER Minister nen online-in a project kan hawn zawh ruailin, processing unit dinna tur sum Rs. vbc 30.13 chu an rawn sanction nghal a ni" a ti bawk.#zabilianznews

Champhai district chu sawhthing thar tam district a nih angin Mualkawi-ah processing unit pui ber dina, a chawmtu tur a tenau deuh zawk pathum - Tualcheng, Vaphai leh Zotlang-ah din an rilruk tuh Chief Minister chuan a sawi.

Sawhthing market a that zel theihna turin sawhthing hrisel thar a tul thu Lalduhoma chuan sawiin, "kan ram leilung a tihchhiat nasat loh nan sustainable cultivation kan kalpui a ngai a. Chumi lam hawi zawnga kal hret hreta, engtikah emaw chuan Organic state-a inpuan kan duh" a ti bawk a ni.#zabilianz #zabilianznews #zofatehuapzo