Minister-in LMC Ward VI-a zirna kawnga hmasawnna thlen tura hmalakna tur -Project Lamlian - a hawng

#ZabilianZ May 07, 2026: Lunglei Municipal Council (LMC) Ward VI huam chhunga zirna kawnga hmasawnna liantham thlen tura hmalakna tur -Project Lamlian - chu vawiin khan Minister Lalrinpuii'n a hawng.

LMC Ward VI bialtu Councillor R. Lalremsiama'n Project Lamlian chuan thil tum lian tak tak panga a neih thu sawiin, naupang tana tuiawm tur zir dan kawng thar duan, zirna hmanraw tihchangkan, zirlai leh zirtirtu ten zirna in an ta neih theihna tura hmalak, zirna in nuam leh felfai buatsaih leh mihring nun kawng kawhhmuhna lam uar te a nih thu a sawi.

Project hlawhtlinna turin English zirtir kawngah DISHA Foundation thawhpuiin, PM Poshan Garden buatsaih kawngah Horticulture leh Agriculture Department; Dan leh Career Awareness pek kawngah Legal Services Authority; zirna in hrisel, fai leh thianghlim buatsaih kawngah Health department leh Education department te nen an thawkho dawn tih bialtu Councillor chuan a sawi.

Ward chhunga zirlaite tan Education Grievances Code an kalpui dawn tih pawh sawiin, zirna kawnga harsatna nei te chuan QR code scan-in, chutah chuan an harsatna an ziak anga, Ward committee-in an harsatna chinfel dan tur an zawnpui thei dawn tih a sawi bawk.

He Project hawngtu Minister Lalrinpuii chuan hmasawnna dik leh ngelnghet nei turin a bulṭhut dik a pawimawh thu sawiin, zirna lamah pawh a bulṭhut – naupang lam, primary school aṭanga ṭana, nasa zawka hmalak a tul thu a sawi a. LMC Ward VI chhungah Primary school-a zirna ṭha zawk thlen tura, syllabus pangngaiin a huam si loh, ṭangkai si te kalpui tura ruahman a ni chu lawmawm a tih thu a sawi a ni.#zabilianz #zabilianznews #zofatehuapzo