Pro Volleyball League-a hman tur bika siam -Vakul- tlangzarh

#ZabilianZ May 07, 2026: Mizoram Rural Bank Pro Volleyball League-a hman tura Nivia company-in a siam  siam volleyball 'Vakul' tih chu vawiin khan Pro Volleyball Organising Committee Chairman Lalsawmliana Pachuau-in a tlangzarh.

Infiamna bungrua leh hmanraw hrang hrang siamtu company Nivia hian kumdangah pawh pro volleyball-a hman tur ball a tumsak thin a, kuminah pawh spot volley tumsak leh tho mahse, Mizoram volleyball inelna sangberin mipui hlut hlawha hmalam a pan zel avangin a hranpa liau liauvin a siamsak a, a bika ball hman turah hian a hming 'Vakul' tih chhutkai a nih bakah pro volleyball logo nemkai a ni bawk.

Pro Volleyball Organising Committee Chairman, LPS Vision Director ni bawk Lalsawmliana Pachuau chuan pro volleyball tan thil thar leh hmasawnna chhinchhiahtlak a nih thu a sawi a. LPS leh Mizoram Volleyball Association (MVA)-in India rama company lian ngaihven tham inelna an buatsaih thei chu thil lawmawm a nih thu a sawi bawk. 

MVA Vice President C Lalrokhuma'n Mizo nun hluiah, thangchhuah leh khuangchawi thei te chauhvin Vakul chang an tawn theih thu sawiin, pro volleyball pawh pro division-a awm club-te chauhvin an khelh theih inelna sang a nih avangin ball hming atan pawh 'Vakul' tih chu thlan a nih thu a sawi a ni.#zabilianz #zabilianznews #zofatehuapzo