#ZabilianZ June 17, 2026: Rajya Sabha inthlan lo awm tura MNF party Election Agent Eva Tochhawng-in ZPM Rajya Sabha MP candidate-in TV interview-a cross-voting awm thei lo leh party MLA ten party official candidate an vote loh chuan an vote thi tur anga a sawi chu thu diklo a nih thu a sawi.
Rajya Sabha inthlan lo awm tura MNF party Election Agent chuan India danpui article 80-na angin, Rajya Sabha-a state tin aiawh tur te chu an Legislative Assembly member thlan ten an thlang thin tih sawiin, MLA-te chu an party candidate-te vote tura beisei an nih thu a sawi a. Kum 1998 June thlaa Maharashtra-a Rajya Sabha inthlanah cross-voting a awm tan thu sawiin, cross-voting a awm loh nan Representation of the People Act, 1951 a Section 59-na chu kum 2003-ah siamṭhat a nih thu a sawi.
Dan siamthat chuan "Rajya Sabha inthlana vote thlak dan chu open ballot hmanga tih tawh tur a ni" a ti tih Eca Tochhawng chuan sawiin, "he dan thar a lo awm hnuah hian The Conduct of Election Rules, 1961 ah pawh Rule 39AA siam belh leh a ni a, Rule 39AA ang hian party ten Rajya Sabha MP inthlanah authorised agent pahnih an ruat thei a. Dan tharah chuan MLA ten an duh duh vote thiang mahse, an party authorized agent te kha an vote an hmuhtir phal tur a ni a. an phal lo emaw, midang an hmuhtir emaw a nih chuan an vote kha a thi thei ta zawk a ni" a ti. Independent MLA-te erawh chuan an vote chu tumah an hmuh tur a nih loh thu a sawi bawk.
India Danpui siamṭhat vawi 52-na in kum 1985-a Tenth Schedule hmanga anti-defection law a tihchhuahah Parliament emaw State legislature member ten an party member nihna an bansan emaw, an party thupek kalhin House-ah vote an thlak emaw chuan House aṭanga ban theih ti mahse, Rajya Sabha inthlan chu dan chuan Legislative Assembly chhunga thil thleng angah a ngai lo tih Eva Tochhawng chuan a sawi a. Kuldip Nayar vs Union of India (2006) case-ah Supreme Court-a Chief Justice of India Y.K. Sabharwal kaihhruai judge 5 awmna bench-in "‘open ballot’ system hian Danpui a kalh lo" tia thubuai an lo hnawl tawh thu a sawi.
Election Commission of India-in kum 2017 ah thuchhuah siamin, "Party thupek bawhchhiaa a vote thlak chungchangah ‘Anti-Defection law - 10th Schedule dan’ hi Rajya Sabha inthlanah hman a ni dawn lo” tiin a lo tarlang tawh tih Eva Tochhawng chuan a sawi bawk a ni.#zabilianz #zabilianznews #zofatehuapzo
0 Comments