#ZabilianZ Aug 19, 2026: Sairang thlenga rel service-in a nghawng leh Kaladan Multi-Modal Transit Transport Project (KMMTTP)-in a nghawng tur te zirchiangtu committee-in Sairang thlenga rel a service hnu ah ILP tha taka kenkawh tul an ti.
Impact Study Committee on KMMTTP and Railway Link between Bairabi and Sairang chuan vawiin khan Chief Minister Lalduhoma hnenah an zirchianna report an thehlut a. ILP tha taka kenkawh a tul thu te, Mizoram chhunga rel kawngin a paltlang khua ten hlawk zawka rel an chhawr theihna tura rel station tin te panna kawng tha neih a tul an tih thu te an tarlang.
Sairang leh Aizawl inkar taxi chuan man to lutuk avanga mi tam takin rel an chhawr tangkai tawk loh thu pawh report-ah tarlang a ni a. Rel leh KMMTTP chu Mizorama sumdawng te leh lirtheia eizawng ten an hlawkpui thu te, Mizo sumdawng ten Zakhai tawng emaw Kawl tawng emaw an hman theih phei chuan tun aia an hlawkpui tur thu te, khawtlang himna leh dan zawm kawngah mipuite inzirtir uar a tul thu pawh tarlang a ni.#zabilianznews
KMMTTP chu kum 2027-a hawn a nih dawn chuan chak taka hmalakna tur a tam nia an ngaih thu pawh report-ah chuan tarlan a ni a. Zochachhuah leh Salachhuaha sumdawng ten an mamawh an sawi tam ber chu Godown a nih thu te, Zokhawthar lama mi te sawi langsar ber chu Indo - Myanmar - Thailand Corridor tihhlawhtlin a nih thu te an tarlang bawk.
Chief Minister hnena report thehluhnaah hian Impact Study Committee hi an Chairman MLA T. Lalhlimpuia leh Member Secretary Zomuana ten an ho a ni.#zabilianz #zabilianznews #zofatehuapzo
0 Comments