#ZabilianZ Sept 22, 2026: Congress thalaiin "ZPM President thar Pu Lalduhoma'n an party kal dan mumallo sawimam a tumna lamah kohhran zirtirna leh thurin palzut zawngin thu a sawi" tiin, a rang thei ang bera kohhran leh mipui hnena ngaihdam dil turin an phut.
Nimina ZPM President thar atana puan a nih hnua a thusawiah Lalduhoma chuan "Pathian meuh pawhin thuthlung a thlak fo thin a. Lal Isua ngei pawhin ngaihdan a thlak fo bawk", a ti niin Congress thalai chuan an sawi a. Hei hi kohhran zirtirna leh thurin palzutnaa an ngaih thu an sawi.
Congress thalai chuan ZPM President thusawi chuan India ram kohhran hrang hrang thurin leh Presbyterian kohhran thurin II-na - Pathian chu a miziaah te, finnaah te, thiltihtheihnaah te, thianghlimnaah te, diknaah te, thatnaah te, taknaah te leh hmangaihnaah te tawp chin nei lo, chatuan mi, danglam ngai lo a ni- tih chu a kalh tlat nia an ngaih thu an sawi a. "Pathian chu a chungnung a, a duh ti turin a zalen a, a Lal a ni" tiin, "party pakhat president dinhmun inthlakthleng sawifiahna atana Pathian hman chu kohhran upa tih atan phei chuan thil mawi lo tak a ni a. Kan kohhran kalphunga Pathian kan hmuh dan a kalh a ni" an ti bawk.
ZPM-in an tih loh tur an tiam nia sawiin, Congress thalai chuan "an MLA candidate ten Pathian leh mipui hmaa dingin, chhechham meuha intiamin, 'min enchhin rawh u', an ti" an ti a. Mipui pawhin beiseina sang tak nen thlang tling mahse, an intiamna te an bawhchhe fai vek nia sawiin, an President thar pawh kohhran zirtirna kaileka, Pathian meuh pawh danglam mai mai, Isua Kristia pawh ngaihdan thlak mai mai thin, a tih loh tur ti leh hnuhnawh thin anga sawiah an puh a ni.#zabilianz #zabilianznews #zofatehuapzo
0 Comments