ZPM-in Zoram mipuite tiam theih zawng zawng min tiam a, min phatsan leh si :Congress thalai President

#ZabilianZ Sept 21, 2026: Congress thalai President Ngurdingpuia Pachuau-in ZPM party-in Zoram mipuite tiam theih zawng zawng an tiam nia sawiin, "min phatsan leh si" a ti a. Kum hnih leh thla kaw vel sorkarna an chelh tawhah beidawnna thlentu mai niin a sawi.

Congress party political session vawiina neihah he thu hi Congress thalai President chuan a sawi a. "Anmahni avang hian politician te pawh hi mi tam takin min hmuh khawloh phah ang tih a hlauhawm hle a ni" a ti bawk.

Mipuiin thil an hre rei thei lova, an chhinchhiah reng peih lo nia sawiin, Congress thalai President chuan "ho te ah kan lungawi leh mai thin" a ti a. "ZPM kan thlan tlin chhan leh mipui hmaa an intiamna zozai te kha sawi dawn ila enlet leh lo chuan point 10 sawi chhuak thei pawh kan awm lo maithei a ni" tiin, "kum 2023 inthlan hmaa mipuite min tiam leh a hnu lama mipui hmaa an sawi te kha an tihlawhtling reng em? tiin mipui te zawhna a zawt.#zabilianznews

ZPM chu Chief Minister leh President nih kawp thiang lo tia au thin, tuna nih kawp tha ti leh si nia sawiin, "mahni leh mahni in debate thiam, dawt pawh confi taka sawi thiam an nei" a ti a. MNF chungchang pawh sawiin, "an pu ber in mumang a ngah thin deuh a, mark an hmu tlem deuh mai thei" tiin, Congress party hotute erawh chu tawngkam thiam hluah ni si lo, ti deuh churh, rinawm deuh tlut, belhchian dawl ru fu si niin a sawi.

Congress party hruaitu ten thalaite pawimawh zia hriain Mizoram Youth Manifesto 2028 siam a nih tur thu an sawi nia sawiin, lawmawm a tih thu a sawi a. Mizoram Youth Manifesto 2028 chu an party-in siam mai lova Mizoram thalaite manifesto atana rawt duh nei te tan remchang siam a nih tur thu an party hruaitu ten an sawi niin a sawi bawk.#zabilianznews

Mizorama sorkar siam tawh party hrang hrang zingah mipui thinlunga riak tlat leh cham reng chu "Congress party chuan ka ti ang an tih chu an ti mai thin" tih a nih thu Congress thalai President chuan a sawi a. Hei hian Congress party hotute rinawm zia leh innghahna tlak an nih zia a tichiang niin a sawi.

Congress party chu thutiama dingnghet tlat thin, dawt leh tihhlawhtlin loh tur leh suangtuahna sawi ve ngai lo party nia sawiin, "Zoram mipuite hian i ring ngam ang u, enchhin ngai lo hriatchian sa an ni" a ti a. Mizorama political party lian pathum zingah hotu an nei tha lawrlak nia sawiin, "a mal te tea buk tawn pawha buk rit ber leh keu neuh neuh pawha belhchiandawl ber tur hotu rual nei tha ber kan ni" a ti bawk.#zabilianz #zabilianznews #zofatehuapzo