#ZabilianZ Sept 21, 2026: ZPM party President thar atan ZPM Leader, Chief Minister nilai Lalduhoma ruat a nih thu vawiin khan ZPM Val Upa Council (VUC) Secretary Prof. Thangchungnunga'n a puang.
ZPM VUC Secretary chuan ZPM Senior Vice president atan Dr. Kenneth Chawngliana; Vice President atan MLA nilai Lalmuanpuia Punte leh Treasurer atan MLA nilai T. Lalhlimpuia te ruat a nih thu a puang bawk.
Tarlan tawh angin August ni 26, 2026-a ZPM party executive committee țhukhawmin ZPM party Offiice Bearer thar tur chu thlang lovin, VUC-in a țul anga phungbawm sawmin ruat se" an ti a. September ni 8, 2026-a executive committee thukhawm leh in - party hruaitu chungchang ZPM Dan bu-a awm - 'Minister leh party elected office bearer nihna chelhkawp theih a ni lovang' tih chu 'Chief Minister (minister dang tel lovin)-in party elected office bearer a chelhkawp thei ang' tia siamthain an pawm zui bawk.
ZPM President thar Lalduhoma chuan hruaitu thar ruat chungchangah Pathian an rawn nasa nia sawiin, hruaitu thar atana ruat te chu Pathianin an tawngtaina VUC kaltlanga a chhannaa an ngaih thu a sawi a. Hun inher mil zelin ZPM pawh an inthlak danglam chho nia sawiin, "Chief Minister leh party President chelh kawp tha kan ti lova, engemawchen kan kalpui a, tunah erawh kan thatna tur zawk nia hriain party thuneitu sangin Chief Minister leh party President nihna chelh kawp chu tha zawk dawnin a hre leh ta a ni" a ti.
Chief Minister leh party President nihna chelh kawp chu an enchhin dawn tih sawiin Lalduhoma chuan "a that loh chuan a tha zawk hmangin kan kal leh mai dawn a ni" a ti bawk.
Pawl leh party hrang hrangah committee thu tiputru duh an awm fo thu pawh Lalduhoma chuan sawiin, meeting thurel, a tam zawk duh dan pawm harsa ti thin pawh an awm niin a sawi a. "Pu chuam neih te, hotute tlawna tlaktlum tum thin te, intihtheih ching te, ram leh party ni lo, mahni tana chakai khawrh thin te zawng zawng hi ZPM party-ah chuan dinhmun sang chelh tur atan kan duh lo” a ti bawk a ni.#zabilianz #zabilianznews #zofatehuapzo
0 Comments