Kum 5 kalta chhunga kumtin Police 100 chuang an thih thin chhan tam ber chu zu leh ruihhlo kaihhnawih a ni :Home Minister

#ZabilianZ Oct 21, 2026: Home Minister K. Sapdanga'n kum 5 kalta chhunga kumtin Police 100 chuang an thih thin chhan tam ber chu zu leh ruihhlo kaihhnawih a nih thu sawiin, tuna training mek te chu ruihhlo laka fihlim zel tur leh harsatna nei te pawh hotute pan hreh lo turin a chah.

Police Training School (PTS), Thenzawl-a cadre promotional training mek te a tlawhnaah he thu hi vawiin khan Home Minister chuan a sawi a. Mizoram Police-ah harh tharna a thleng mek nia sawiin, tunhnaiah constable 259 merit based-a, dan dik taka lak an nih thu leh an discipline a that thu a sawi.

Cadre promotional training mek - JUO (Junior Under Officer)  97; SUO (Senior Under Officer) 89 leh PCC (Platoon Commander Course) 87 te chu probationer te hotu tur an nih tawh avangin rilru thar pu a, Mizoram Police hmel thar dintu ni zel turin Home Minister chuan a chah a. "Constable 350 leh Home Guard volunteer 94 lak thar leh tur pawh dik taka merit based-a lak leh an ni ang" a ti.#zabilianznews

Mizoram Police danglam bikna chu 'Mizo tlawmngaihna' a nih thu sawiin, mipuiin Police hmel an hmuha an thlamuan phah theihna tura hlim hmel pu chunga dan te kengkawh tur leh Police Station pan mi mangangte pawh lo tanpui thuai thin turin Home Minister chuan a chah bawk.

Cadre promotional training mek mi 350 te hian September ni 1, 2026 khan training tanin, November ni 20-ah an zo dawn a. Anni bakah hian Excise & Narcotics atanga Constable, driver, SI leh Inspector basic training mek 39 an awm bawk a, hei hi thla 6 course niin, kum 2027 February thla laihawlah an zo tuhng dawn a ni.#zabilianz #zabilianznews #zofatehuapzo