ICT deptt-ah kumina kan budget Rs nuai 500 chauh ni mahse, Rs nuai 10,000 dawn kan thawkchhuak tawh :Robert Romawia

#ZabilianZ June 26: MNF party adviser, ICT, Tourism leh Sports changtu Minister of State ni bawk Robert Romawia Royte-in “ICT deptt-ah kumin (2023-24)-a kan budget Rs nuai 500 chauh ni mahse, Rs nuai 10,000 dawn kan thawkchhuak tawh" tiin, thawhchhuah lama tanlak a pawimawh thu a sawi. 

MNF party chhung inkhawm, vawiina an party pisa Mizo Hnam Run-a neihah he thu hi Robert Romawia chuan a sawi a. Tourism deptt. budget Rs nuai 1,100 chauh a nih laiin, hnathawhna tur cheng nuai sing chuang an nei tawh nia sawiin, "Sports & Youth Services deptt. budget pawh Rs nuai 2,561 chauh ni mahse, sports school ringawt pawh panga kan nei dawn a, kan deptt budget hi sports school pakhat sakna pawh a ni lo,” a ti.

Tunhnaia Delhi-a Union Finance Secretary a hmuh chungchang sawiin, Robert Romawia chuan "Chief Minister Pu Zoramthanga rawtna angin Special Assistance to States for Capital Investment (SASCI) Part-I 2023-24 atan Rs. nuai 20,000 Mizoram min pek belh dawn a, in ka thlen rualin sanction order min rawn thawn" a ti a. 

SASCI pawisa rulh dan tur sawifiahin, “Mizoram Assembly-a state budget pass hmasakber chu Rs vbc 17 vel a ni a, kum 50 liam hnuah tuna kan budget chu Rs vbc 14,000 vel a ni. SASCI hi kum 50 hnuah rulh chauh tur a ni a. Kum 50 a vei leh meuh chuan rulh tur Rs. vbc 700 hi eng tham mah a ni lovang,” a ti bawk.

Aizawl East-II bialtu MLA Robert Romawia chuan kumina MLA inthlan lo awm tura Hachhek bial lama a insawn tur chungchang pawh sawiin, “Aizawl East-II bial hi ka tlanchhiat san lova, MNF candidate tur tan ka rochun zawk a ni,” tiin, nomination committee-in a bial chhuahsana ding tur chu uluk taka an thlan a rin thu leh chu mi chu hneh taka a tlin pawh a rin thu a sawi. 

Hachhek bial mipui ten ramria awm an nih avangin ruling party bialtu neih an chak ve tawh nia sawiin, Robert Romawia chuan Aizawl East-II aiin bial a hahthlak dawn tih pawh hre mahse, vuivaia a lak loh thu leh politics-a a luhin khawi bialah pawh ding tura a inpeihsa hrim hrim thu a sawi bawk. 

Tunhnaia sorkar laipui a dawr chungchang sawiin, high level committee on internally displaced person-in raltlante a ngaihsak a, Mizoram Chief Minister-in chhawmdawl a rawtna pawh an pawm thu Union Home Secretary-in a lo hrilh niin Robert Romawia chuan a sawi. 

"MNF-in kan manifesto (2018) no. 1-ah Zofate rorelna pakhat hnuaia awmkhawm tura hmalak a ni ang, tiin kan dah" tiin, hmun hrang hranga Zofate kuangkuaha va hnaih tura Zo kutpui te an buatsaih thu a sawi a. State pawn bakah Tahan leh Maryland thlenga Zofate insuihkhawmna tura budget-ah pawisa an dah thu leh Covid avanga an tihhlawhtlin theih tak loh thu a sawi. 

Sorkar tehna chu manifesto tihhlawhtlin kawngah a nih thu Robert Romawia chuan sawiin, “Opposition party ten kan manifesto-ah min teh rawh se" a ti a. "Congress sorkar lai khan ‘Manifesto atangin min teh rawh se’ an ti ve ngai em? Anni chuan kan inziahthatsiak an ti a nih kha" tiin, Zoramthanga kaihhruai sorkar chu manifesto tihhlawhtling tam ber nia sawiin, "Kan manifesto pawn lama kan thawh ringawt pawh hi Congress kum 10 sorkar chhunga mi a zat tawh hial ang.” a ti bawk.

Eptu party chungchang pawh sawiin, Robert Romawia chuan ZPM chu nomination committee-in an danpui an bawhchhe nghal niin a sawi a. "Party pariata awm lawr tawh hi Chief Minister atan thlantlin an la awm lo,” a ti. 

Congress sorkar chungchang pawh sawiin: “Mizoramah lapse pui (mega lapse) vawihnih a thleng tawh a. Financial management-ah expenditure management a pawimawh ang bawkin income management a pawimawh" Robert Romawia chuan a ti a. "Kum 10 sorkar tawh leh tun term sorkar income hi intamhleih tak a ni. Neihsa tlemte renchem aiin source dik tak atanga thawhchhuah tam a pawimawh zawk. A inren pun theih loh a, income capacity tihsan a ngai,” a ti bawk a ni.