Lalruatkima'n MLA fund hmanga hnathawh a hawng

 #ZabilianZ June 26: Aizawl West II bialtu MLA, Minister ni bawk Lalruatkima'n a bial chhung Dinthar Venga awm, Gorkha sikul Govt. Gairigaon Primary School building zauhna, MLA fund Rs. 6,49,000 senga sak chu vawiin khan a hawng a, Govt. Dinthar High School a tlawh bawk. 

Kum 1962-a din Govt. Gairigaon Primary School building zauhna sak thar chu MLA fund hmannaah chuan lungawithlak a tih thu Lalruatkima chuan a sawi a. "Mizoramah tawng pathum - English, Hindi leh Mizo tawnga zirna sikul a tam lo hle, Gairigaon School-in tawng chi thuma naupang an zirtir thin hi a ropui a ni" a ti.

Minister Lalruatkima chuan zirna chu ram leh hnam dinchhuahna pawimawh tak a nih thu sawiin, "khawvelah zirna hian tawpni a nei lo, mihringte chu inzir reng tur kan ni a, zirna chawisan kawngah mitinin tan lak a ngai a, a bikin nu leh pa ten fate thiamna zirtir kawngah mawhphurna pawimawh tak an nei ve" tiin, nu leh pate chu an fate enkawl kawngah tan la turin a chah.

Lalruatkima chuan Gorkha ten hun rei tawh tak atanga Mizorama cheng tawh an nih avangin ram hmangaihna thinlung lian tak an nei tih sawiin, Mizoramin hmasawwnna rahbi thar a rah theihna tura theihtawpa thawk chhunzawm zel turin a chah a. Mizote leh Gorkha-te inkarah inunauna tha tak a awm thu leh inunauna chuan rahtha a chhuah fo thin thu sawiin, lungrual taka Mizoram hmasawnna atana thawpuiah a sawm a. School tan whiteboard pathum pein, inthiarna (toilet) sak belh ngai pawh Education Minister hnena a thlen tur thu a sawi bawk.

Govt. Gairigaon Primary School building zauh takah hian class room pali a awm a. He sikul ah hian zirlai 115 leh zirtirtu-6 an awm mek a ni. 

Hemi hnu hian kum 1989-a din Dinthar High School pah tlawhin, Lalruatkima chuan study tour neihna tura a tula an hman atan Rs. 50,000 a pe a. He sikulah hian zirlai 45 leh zirtirtu-8 an awm mek a ni.