Prime Minister Narendra Modi phei chu Manipur tlawh chu sawi loh, Manipur buaina chungchanga ngawi hmakah MPCC chuan an puh a. Chief Minister Zoramthanga pawh hmalak ngaihna hre lova puhin, "kan unaute himna leh damkhawchhuahna lam pawh ngaihtuah lovin campaign buaiin a buai" an ti bawk.
Vawiin Pathianni, Kristian te ni serhah Langza khuaah Meitei ho lutin chenna in bakah Pathian Biak In nen lam an hal fai vek thu te, khua leh tui te chhanhim tuma beitu David Thiek lu tansaka khaw daia rapthlak taka an tar thu hriat tur awm te a awm laia Chief Minister Zoramthanga campaign buaia a buai chu mak an tih thu MPCC chuan an sawi.
"Amah pawh be duhlotu, Manipur Chief Minister Biren Singh-a Zohnahthlak te chunga rawng taka a chet hnuah phone hmangin a bia a, chu chu a hmalakna neihchhun a ni" tiin "Pu Zoramthanga Chief Minister na hnuaiah hian Mizoram leh Zohnahthlakte dinhmun a himlo takzetah Congress party chuan a ngai" Congress party chuan an ti.
Congress party chuan "Manipura kan mi leh sa te chunga rawng taka chetna titawp tura hma la thuai turin MNF sorkar kan ngen" an ti a. "Kan unaute dinhmun hima an awm hma loh chuan BJP an thawhpuina pawh a ranglama chhu chat nghal turin kan ngen a, MNF party nge an dah pawimawh Mizoram mipui leh Manipura Zohnahthlakte himna tih thlang fel thuai turin kan phut" an ti bawk.
MPCC chuan Central leh state-a Congress hruaitute inberawn zelin Manipura Zofate sahimna turin chak zawkin hma an la zui zel dawn niin an sawi a. "Kan unaute leh Christian sakhua chimral tuma nekchep mektu BJP paihthla tura tangrual turin Mizoram chhunga NGO te, kohhran leh party hrang hrang te kan ngen" an ti bawk a ni.
0 Comments