Tualthattua puh te Police-in la kawl zui dawn - July 4-ah Court-ah an inlan leh ang

 #ZabilianZ July 02: June ni 30, 2023 zana Reiek kawng Dihmunzawla thlam pakhata thi-a hmuh C. Vanlallawma thattu nia rin mi pahnih - Lalroliana (43) leh Lalsiampuii (40) te chu vawiin khan Court-ah hruai an ni a, Police-in darkar 48 chhung la kawl zui an dilna chu court-in a phalsak.

Tualthattua puh Lalroliana leh Lalsiampuii te hi July ni 4, 2023-ah Court-a inlan leh tura tih an ni a. C. Vanlallawma chu an thah ngei a nih thu leh thikthu vanga that an nih thu Police hmaah chuan an sawi tawh nia thudawn a ni.

Tualthattua puh Lalroliana chuan a ruala man Lalsiampuii nen nupa nia insawiin, C. Vanlallawma te nen pawh inhmelhriat sa an nih thu a sawi a. A nupui Lalsiampuii leh C. Vanlallawma te awm danah lawm loh na a neih avangin tum lawk pawh awm lovin C. Vanlallawma chu a that ta mai niin a insawi.

Tarlan tawh angin YouTube lama live-a Ghost Hunting ti thin ten June ni 30, 2023 zan khan Dihmunzawl-a thlam pakhatah mitthi ruang an hmu a, Police an hriattir hnuah mitthi chu kum 60 mi, C. Vanlallawma a ni tih hriat a ni a, Forensic lam thiam ten a ruang an endik hnuah mi kuttuar-a thi ni ngeia rin a nih avangin chhui zui a ni a, July ni 1, 2023 chawhnu dar 1 vel khan a thattu nia rin Lalroliana leh Lalsiampuii te chu Seling dai-ah Police-in an man ta a ni.

Mi kuttuara thi nia rin C. Vanlallawma ruang hi Ramthar Veng, Lunglei-a a unaupa-in lain, nizan khan vui liam a ni.