Tualthattua rin mi pahnih Seling-ah man, Aizawl thlenpui tawh an ni

 #ZabilianZ July 01: Nizana Reiek kawng Dihmunzawla thlam pakhata thi-a hmuh C. Vanlallawma thattu nia rin mi pahnih - Lalroliana (43) leh Lalsiampuii (40) te chu vawiin chawhnu dar 1 vel khan Seling-ah Police-in an man.

Kum 60 mi, C. Vanlallawma thattu nia rin vawiina man te hi Aizawl thlenpui tawh niin, naktukah Court-a hruai an ni dawn niin Police hotute chuan ZabilianZ an hrilh.  

C. Vanlallawma hi YouTube lama live-a Ghost Hunting ti thin ten nizan khan Dihmunzawl-a thlam pakhatah thi-in an hmu a. Police hriattir nghalin, Forensic lam thiam ten a ruang an endik hnuah mi kuttuar-a thi ni ngeia rin a nih avangin chhui zui a ni a, vawiin chawhnu dar 1 vel khan a thattu nia rin chu Seling-ah an man ta a ni.

Nizana thi-a hmuh C. Vanlallawma ruang hi Ramthar Veng, Lunglei-a a unaupa-in lain, Lunglei panpui mek a ni a, zaninah vek vui nghal tura ruahman a nih thu YMA, Ramthar Veng, Lunglei hruaitute chuan ZabilianZ an hrilh bawk.