Dr. Lalrinawmi Ralte hnenah hmeichhiate humhim kawnga thawk tha Zakapa Award hlan

#ZabilianZ Sept. 22: Hmeichhiate venhim leh an dinhmun chawikan kawnga hnathawk tha chawimawina -Zakapa Award, 2023- chu Mizoram pawn lama Mizo hmeichhia harsatna tawkte tanpui leh chhanchhuah hna thawk tha Dr. Lalrinawmi Ralte, Tlangnuam, Aizawl hnenah hlan a ni.

Sailulak lal Dokhama fapa, 1839-a a piang Fanai lal huaisen Zakapa hian hmeichhiate a humhimna lama khin a nihnaah South Lushai Hills Superintendent CS Murray lakah thiam a chang a. Kum 1891-ah CS Murray chuan Zakapa lal na Khawhri a luh dawnin, lamkal tirin a riahpui tur nula lo ngaihtuahsak turin a ti a. Hei hian lal Zakapa chu a ti thinur hle.

CS Murray-a'n Khawhri a thlen chuan lal Zakapa hnenah a nula riahpui tur a lo ngaihtuahsak em tih a zawh chuan Zakapa chuan chutiang hmeichhia an khuaa an awm loh thu in a chhang a. CS Murray chuan Zakapa hnenah "nula min zawn hmuhsak thei lo a nih chuan i nipui min pe tur a ni" a tih chuan Zakapa chuan banglaia a silai chuhin hmun leh hmunah CS Murray chu a tin ta a, CS Murray leh a ho te pawh an insaseng ta a ni.

Hemi tum hian Zawlbuk-a CS Murray-a sipai inkulh te pawh Zakapa pasaltha ten hal hnanin, a tlan chhuak apiang an kaphlum a, hmun danga kal dar te pawh kaphlumin an lu an saksak ta zel a. CS Murray pawh tlanchhiain, vahchapa Zakapa leh a ho ten an um fe hnu ah himin a chhuak hram.

He thil thleng avang hian kum 1896-ah Zakapa chu man a ni a, Culcutta (tunah Kolkata)-ah hruaithlak niin, a chung thu ngaihtuah a ni a. CS Murray chet dan mawi lo tak avanga lo beilet mai a nih thu a sawi chu a dik tih finfiah a nih tak avangin thiam chantir a nih bakah CS Murray chu a hna chelh zui zel tlaka ngaih a nih loh avangin ban a ni ta bawk.

Heng bakah pawh hian Zakapa huaisenna sawi tur tam tak a awm a. Social Welfare & Tribal Affairs Department hnuaia Women & Child Development chuan Zakapa'n hmeichhiate humhim kawnga a huaisenna avangin cheng nuai 1 keng tel 'Zakapa Award' hi an buatsaih ta a ni.