Lunglei mipuiin an thlang sual tih an hre tan mek :Robert Romawia Royte
MNF party chhung inkhawm vawiina neihah ZPM party nihphung sawiin, Robert Romawia Royte chuan "Thianghlim famkima an ingaihna tak hi Pathian leh mihring tehna atang pawha an fail-na chu a ni" a ti a. An thiltihah an nihna a lang lawi si niin a sawi.
Robert Romawia Royte chuan mipuiin ZPM chungchanga thudik an hrechiang ta nia sawiin, "Unit kan din dawn lo ti thin khan a theihna apiangah an din a, MLA hlawh sang kan la ve dawn lo an tih laiin a la hmasatute an ni" a ti a. MLA car man tur sum an dawn ve loh tur thu leh designation plate an tar ve loh tur thu an sawi chungchangah pawh "MLA Car leina atana sum la hmasa leh MLA designation plate pawh a tar fiah fiah an ni" a ti.
MNF Adviser chuan "tuna ZPM leader ang chi, political party 9-a zuang lawra fail vek tawh hi a party 10-na ah pawh a fail leh mek a, Super CM tura enchhin chi a ni lo", a ti a. "ZPM MLA candidate list en ila CM atan Pu Duhoma test duh tur chu tlem te an ni" tiin, ZPM chu an hotu lian tam takin an tlanchhiatsan mek niin a sawi.
Congress party chungchang pawh sawiin, Robert Romawia chuan "An hun a liam tawh," a ti a. "Thenawm state-ah an tlachhe vek tawh a, Mizoramah pawh an hma lam hun a thim khawp mai" tiin "ZPM, Congress leh BJP-a la awm mek te chu inngaihtuah chianga opposition-a awm reng ai chuan ruling party ni zui zel tur MNF party-a lo lut ve turin ka sawm a ni," a ti.
MNF, Adviser, Minister of State ni bawk Robert Romawia chuan Finance Deptt-in RTI zawhna an chhan danin Covid vanga Mizoramin sum a hmuh tur chiang sa Central-in a release loh Rs nuai 2632.32 chu suma Mizoram harsat chhan lian ber a nih thu a sawi a. State sorkar thawhchhuah ve tur pawh cheng vaibelchhe tam tak covid avanga hloh a nih thu sawiin, "Mi thenkhatin mipui bum nan covid tanpuina sorkarin dawng teuh teuh angin an sawi a. CM Relief Fund atanga sum tam tak awm angin dawt an sawi thin." a ti.
Robert Romawia chuan "Tukinah Finance Deptt hotute ka zawt a, Covid avanga tanpuina sorkar-in a dawn chu Rs vbc 70 chuang awrh chauh a lo ni" a ti a. CM Relief Fund hmuh zat pawh Rs vbc 31.38 a nih thu CMO atangin ziakin a dawng niin a sawi bawk.
Sum harsatna chu state plan atanga tih ngai - healthcare, hlawh, GP fund, pension fund etc. ten an tuar lo thei lo niin Robert Romawia chuan a sawi a. "Heti taka annual plan sum kan hmu kim lo chunga kan CM zara tha taka kan kal thei hi a ropui em em" a ti bawk a ni.
Comments
Post a Comment