MNF leh Congress party-in lawmthu an sawi

#ZabilianZ Nov 8: Rorellai party MLA-in harsatna liantham awm lova MLA inthlan vote thlak zawh fel a nih avanga lawmawm an tih thu an sawi.

Candidate leh an tana thawktute pawh buaina leh harsatna liantham tawk an awm lo nia an hriat avang te, inthlan buaipuitu te leh vote hmanga duhthlanna lantirtu mipui chungah te lawmthu an sawi a. Venhimna hnathawktute zingah vanduaina tawka nunna chan an awm chu pawi an tih thu leh an chhungte an tawrhpui thu MNF party thuchhuah chuan a tarlang.

Bial tina MNF candidate vote tu te pawh MNF chuan lawmthu an hrilh a. "Inthlan muanawm leh boruak tha min siamsaktu kan Pathian chungah lawmthu kan sawi" an ti.

MNF President Zoramthanga pawhin MLA inthlan vote thlak tluang taka zawh a nih avanga lawmawm a tih thu a sawi a. Election Commission of India press note-ah Mizoram mipuiin phur leh hlim taka 'Democracy Kûtpui' an hman thu tarlan a nih thu sawiin, "Hei hi thil lawmawm tak a ni a, Mizo mipui ten theihtawp chhuahin i vawnghim zui zel ang u" a ti.

Inthlanna buatsaihtu leh buaipuitute, venhimna lam buaipuitu zawng zawngte lawmthu hrilhin, Chief Minister ni bawk Zoramthanga chuan Mizoram People Forum leh political party te thawhhona thuthlung angin - inthlanna zalen, thianghlim, dik leh felfai a awm ngei theihna tur leh sorkar inrelbawlna ṭha a awm theihna tura hmalakna pawh a hlawhtlinna a lang nia sawiin, hmalatu MPF chungah lawmthu a sawi.

Mahni dikna leh chanvo hlen ngei duh, khua leh tui ṭha mawhphurhna hlentu ram mipui te hnenah pawh lawmthu a sawi tih Zoramthanga chuan a sawi a. "A bikin kum upa zawk mahni in lamah leh vote thlakna hmuna vote thlak tura penchhuakte chungah lawmthu kan sawi" a ti.

Kumin inthlanpuiah ECI-in vote thlak tura inzirtirna nasa taka a kalpui thu sawiin, Systematic Voters' Education and Electoral Participation (SVEEP) hmalakna hrang hrang te avangin ram puma vote tla pawh zaa 80.43 a tling tih Zoramthanga chuan a sawi a. "Kan sawi hmaih theih hauh loh tur chu media hrang hranga thawktu ten inthlanpui kan neih zawh taka an thawh hlawk zia kan hmu nasa hle a. An inpekna leh thawhrimna avangin an chungah lawmthu kan sawi a ni" a ti.

MNF President chuan MNF General Headquarters aṭanga MNF block leh unit zawng zawng te leh party tana thawktu dang te leh MNF party thlawptu zawng zawng chungah lawmthu a sawi bawk.

Mizoram pradesh Congress committee (MPCC) pawhin inthlan vote thlak tluang taka zawhfel a nih avanga lawmawm an tih thu an sawi a. Mipuite pawhin vote an thlak tha hle nia an hriat thu leh ram hruaitu thlan an ngaipawimawh chu an ngaihlut thu leh lawmawm an tih thu an sawi.

Inthlan buaipuitu Chief Electoral Officer leh a hote, District leh booth tina inthlan buaipuitute leh MPF ten inthlan muanawm tak leh felfai an kalpui pawh lawmawm an tih thu Congress party chuan an sawi a. Hmun thenkhatah inthlan buaipuitu vanduaina tawk leh harsatna tawk an awm erawh pawi an tih thu leh vanduaina tawk chhung te an tawrhpui thu an sawi.

Congress party candidate vote tu te, Congress party tana tha leh zung, hun hlu senga beitute an ngaihlut thu MPCC chuan an sawi a. "An hnathawh hian sorkar tha min la hruai thleng ngei ang tih kan beisei a, an chungah lawmthu kan sawi" an ti bawk a ni.