ZabilianZ bultantu Pu Alfred Vanchhawng nghilhloh nan

#ZabilianZ Dec 02: Kum 10 vel kalta-ah khan Doordarshan News lama thawk pahnih Pu Alfred Vanchhawng leh kum 2020, April ni 14-a chatuan ram pan ta Pu Francis Paul (Gerrard-a Pa) te khan 'Zabilha'n a ti' tih tawngkam kha an uar thin em em mai a. Zabilha pawl te group siam ang.. tiin an duh dan ang ngeiin Whatsapp lamah mi chi hrang hrang ten zalen leh huapzau taka an vei zawng leh duh zawng an sawi theihna ZabilianZ group a lo piang ta a.

December ni 2, 2022-h Pu Alfred Vanchhawng pawhin ropuina rama min hawsan ve leh tak avangin ZabilianZ chuan facebook leh youtube lamah te huang zauhin a bultantute duh danin chanchinthar puanzarna bakah huam zau taka kalpui zui a ni ta zel a ni.

Vawiin hi Pu Alfred Vanchhawng ropuina rama a chawlh atanga kum khatna champha a lo ni ta reng mai. Pu Alfred Vanchhawng hi May ni 5, 1972-ah Aizawl-ah a piang a, unau pianpui 3 a nei. Kum 2000-ah Mary Lalthanpuii nen inneiin, fa mipa pakhat leh hmeichhe pahnih an nei a, vanduaithlak takin an fa hmasaber Lalruatsangi chu nausen a nih laiin a boral a, a chhang Paul Ngurthantluanga'n ZMC-ah MBBS zir mekin, an tlum ber Mildred Lalhriatkimi'n pawl 11 a zir mek a. Tuikual South Aizawl-a cheng an ni.

Pu Alfred Vanchhawng hi fiamthu duh, mi te tihlim thei em em mai a ni a. Huaisen, tuarchhel leh dawhthei tak niin, midang hriatthiamna ngah tak a ni a. MJA-ah pawh member thar te pawh lo titlangnela, lo kaihhruai thintu ber a ni. A nupui fanaute a ngaihpawimawh thinna kha sawi hmaih phal chi a ni lo bawk ang.

Mi duhamlo tak, thil phal, a neih chhun ang anga lungawi, ‘Don't worry, be happy’ tih thupuia neih tawp mai mi niin, a neihchhun ang ang te midang tan ui a nei ngai lo.

Adventure lama-ah Mizorama sûlsutua chhal ngam, para-sailing pawh ti hmasaber a ni a. Tlang lawn lamah pawh sulhnu neiin, kum 1995-ah meter sang sarih chuanga sang Mt. Abi Gamin pawh a lawn chhuak a, Mt. Everest lâwn thei turin a tling a, sum lama harsatna a neih avangin a lawn thei ta lo. Hemi hnu hian Mizo zingah Mt. Everest lâwn chhuak an awm chuan bawkkhupin chibai ka bûk ang tih chu a thutiam a ni a, Pu David Zohmangaiha’n Mt. Everest-a a lawn chhuah khan a intiam ang ngeiin Lengpui Airport a rawn thlenin bawkkhupin chibai a lo bûk a nih kha.

Pûk luh lamah pawh Mizorama a sûlsutu zingah telin, Pakaw Pûk lut chhuak hmasaber zingah a tel a, pûk dang engemawzat a hova luhchhuah tawh a ni. A thih ni thlengin Zotrek Adventure Club-ah Senior Adviser, Mizoram Sports Climbing Association-ah Executive Member, Mizoram Adventure Foundation Vice President te a ni.

A naupan lai atanga Tennis khel thinin, Mizoram pawnah pawh tum engemawzat Mizoram aiawhin a khel ve tawh a. coach leh manager niin Tennis player-te state pawnah a hruai \hin bawk. Mizoram Tennis Association hruaitute chuan Pu Alfred Vanchhawng hi Mizorama Tennis a than theihna atana mi pawimawh tak niin an sawi thin hial. A thih ni thlengin, Mizoram Tennis Association-ah Executive Committee member leh Aizawl District Tennis Association-ah Joint Secretary a ni.

Kum 2022, February-ah Thin cancer a ni tih hriat a ni a, Delhi leh Aizawl lamah theihtawpa enkawl zui ni mahse, lo chaklo chho tial tialin, December ni 2, 2022 (Zirtawpni) chhun dar 12:15 ah ropuina rama chawl turin min hawsan ta a ni.