Myanmar raltlan lo lut thar zingah registration mumal taka ti an awm lo

#ZabilianZ Feb 04: Siaha district level committee on Myanmar refugees-in raltlan lo lut thar zingah registration mumal taka ti an awm lo tih an pawm a, hemi kawnga chak zawka hmalak tul an tih thu an sawi.

DC Office atanga ID la chhuak lo, ID nei lo man chhuah kawngah tanlak an tum thu sawiin, hemi kawngah hian ramria khaw awm te an tangkai hle tih an sawi a. Village level committee te chu uluk leh chak zawka hma la tura tih ni se, an ti.

Siaha district level committee on Myanmar refugees chuan sawrkar dan dinglai angin DC Office atanga phalna nei te chauh district dangah kal thei mahse, phalna la lem lova district danga kal an awm thin tih sawiin, hemi kawngah pawh hian chak zawka hmalak tul an tih thu an sawi a. Police leh Mara Thyutlia Py (MTP) te hma lo la tura tiin, hemi chungchanga sawrkar dan ding lai chu zau zawka mipui hnena puanzar ni se, an ti bawk.

Raltlan Camp-a dawr awm a tangkai hle laiin, camp pawn lam, khaw chhungah erawh chuan raltlan tan dawr hawn phal loh ni se, an ti a. Raltlan, tuna khaw chhunga dawr hawng te chungchang pawh trade license pe theitu MADC lam nen sawiho ni se, an ti.

Siaha district level committee on Myanmar refugees chuan  raltlan ten lirthei an hman uar ber pakhat Kenbo (two wheeler) pawh khauh zawka khuahkhirh tul an ti a. Siaha khawpuiah phal loh ni se, tiin khawkar kawngah pawh permit nei te chauh tlan tir ni se, an ti.

"Raltlan te dinhmun an hriatthiampui hle laiin a ram leilung fate himna chu thil pawimawh hmasa a ni" an ti a. Raltlan leh ram leilung fate himna pek chu District level committee on Myanmar refugees thil tum ber a nih thu an sawi bawk.

Siaha District-ah refugee camp 41 awmin, raltlan 6044 an awm mek niin Siaha district level committee on Myanmar refugees chuan an sawi bawk a ni.