Editorial : Dawt politics - kan thanmawhbawk

#ZabilianZ July 31: Kan ram politics kan thlir chuan zirchian kher pawh ngai lovin 'dawt' a langsar hle a. Dawt hmanga mipui rilru hruaipen tumna, dawt hmanga mipui hip tumna, dawt hmanga inbeihna leh a dang dang te hi kan ram thanmawhbawk tam tak zinga langsar pawl a ni ngei ang.

Tunhma atang tawhin kan ram hruaitute pawhin mipui hriatah thudik ziktluaklo an sawi fo tih kan hre tlang theuh a, hei hian mipui rilru ah a tha lo zawngin nghawng tam tak a neih theih avangin a pawi hle a ni.

Ram hruaitu chuan mipui hriata a thusawi tur fimkhur leh zual sela, sorkar hmalakna thenkhat phei chu a puanzar lam hmanhmawh lutuk loh tha zawk te pawh a awm thei. Mipui lam pawhin hma la lo angah lo chhuah nghal mai thin lo bawk ila.

Kan ram hruaitu tam takin dawt sawi chan an chan thinna tam tak chu an hmalakna thenkhat a chian tak tak hmaa mipui hriat theih tura an sawi thin vang a ni. Hemi kawngah hian kan ram hruaitu ni mek te pawh an fimkhur a tha awm e.#zabilianz

Kan ram politics-ah thu dik a nih leh nih loh finfiah mai theih loh hmanga inbeihna a tam hle. Heng te pawh hi mipui rilru tichiai thei leh hruaisual palh thei a nih avangin kalsan atan a tha khawp mai.

Party tinin thahnem an ngai tlang a, thahnemngaih tur pawh a ni. Chutih rual chuan thahnemngaih luat avanga thu belhchiandawllo hmanga elpui te beih chin erawh tunlai khawvelah chuan hekna a ni zawk mah tawh ni te pawhin a ngaih theih.#zabilianz #zofatehuapzo

Social media lamah pawh dawt hmanga inbeihna, finfiah harsa lo tak tak hmuh tur a tam thin hle. Comment thenkhat chu han bawhzuia chanchinthar atana han siam awm tak tak te an nih ve thin avangin kan chanchinbumi te pawhin bawhzuiin a comment tu te an han be pawp a, bawhzui vak ngaihna awm lo, a comment tu pawhin thu dik a nih leh dawt a nih pawh an hriat loh, tu sawi nge an hriat tih pawh sawi thei lo te an lo ni leh thin. 

Thu dik lovin min tihnufum thei a, thu dik erawh a tlova, hmasawnna kawngah nasa takin min pui thei bawk. Dawt politics bansana, ram thatna tur duh tak takna thinlung pua, thu dik hmanga politics khel zel turin tan i la sauh sauh ang u.