Chemte-a naupang vau-a pawisa laksaktu nia hriat Police kutah awm tawh

#ZabilianZ Aug 03: Chemte-a naupang vau-a pawisa chhuhsaktu ni ngeia hriat, kum 20 mi Lalremruata, Electric Veng, Champhai, Vaivakawn, Aizawla awm mek nia inchhal chu vawiin khan Chhinga Veng-a thingpui dawr pakhatah man a ni.

Vawiin chawhma dar 11 vel khan Dawrpui veng-ah mipa naupang pakhat dawra thil lei tur chu tlangval pakhatin chemtea vau-in pawisa a laksak a. CCTV atanga en a nih hnu ah naupang pawisa laksaktu thlalak chu social media lamah theh darha zawn zui nghal a ni.

Pawikhawihtu ni ngeia hriat thlalak social media lama theh darh lo hmutu Chhinga veng mi ten chawhnu lamah chemte-a naupang vau-a pawisa laksaktu ni ngeia hriat chu thingpui dawr-ah hmuin, an man a, Police kutah an hlan ta a ni.

Chemte-a naupang vau-a pawisa laksaktu ni ngeia hriat lo mantu Chinga veng mi te chuan, pawikhawihtu nia hriat chu an veng vela an lo hmuh fo tawh niin an sawi a. Vawiin lama a pawikhawih chungchang leh a thlalak chu Instagram lama an lo hmuh thu leh lo ringhlela lo hreng ta an nih thu an sawi bawk.