Kan ramin a mamawh ber chu sum enkawl thiam a ni :John Siamkunga

#ZabilianZ July 26: Congress party political session, Congress Bhavan, Aizawla vawiina neihah MPCC Adviser John Siamkunga'n "Kan ramin a mamawh ber chu sum enkawl thiam a ni", a ti.

MPCC Adviser chuan kum 2008-a Congress an sorkar khan rethei takin bul an tan niin a sawi a, "VIP quota zawng zawng kan surrender a, mi hriat phak bakin kan tuar ve a ni" a ti a. Kum 2018 a lo inher chhuah chuan Mizoramin sum lama harsatna a tawh thin chu an sukiang thei ta nia sawiin, "Finance Commission pawh an lawm hle a ni" a ti bawk.

John Siamkunga chuan "Kan sorkar chu a tla ve leh ta a, party dang an rawn sorkar a, Mizoramin sum lamah harsatna nasa tak kan tawk chho leh ta a ni" a ti a. "ZPM an sorkar a, kum khat em pawh an la sorkar hmain sum tam tak an puk belh a, Mizorama la thleng ngai lo, kan budget Rs. vbc 14412 a nih laiin leiba Rs. vbc 14034.76 kan nei thei hi a mak hle a ni" a ti.#zabilianz

Sorkarin inrenchem a kalpui dan pawh mak a tih thu MPCC Adviser chuan sawiin, "ZPM hian year of consolidation kan hmang an ti a, hei hi kan hrethiam lo" a ti a. Sorkarin leiba a ngah em em laiin a hotu chinin chanvo hrang hrang - board chairman, adviser to CM, consultant leh a dang te an intheisem nia sawiin, inrenchem an kalpui dan chu thil mak tak niin a sawi.

John Siamkunga chuan "Airport hralh an tum pawh hi a chhan kan hrethiam phak lo" tiin, "RTI atanga a lan danin Airport atang hian kum khatah Rs. 19,66,44,228 kan hlep a, sumdawnna ropui tak a nih laiin, engvanga hralh tum nge an nih?" a ti a. "Tuna kan CM zahawm tak, Pu Lalduhoma hian, 'Keini kan sorkar hunah chuan kum 10 atanga 15 chhung repair ngai lovin kawng kan siam dawn', a ti a, hei pawh hi kan en dawn a ni, John Siamkunga chuan a ti bawk.#zabilianz #zofatehuapzo