MJA-in kawng chhia avanga harsatna thleng thin SP an sawipui - thupek kengkawh tur duty dah turin an ngen

#ZabilianZ July 18: Darlak leh Tuidam inkar kawng harsatna chungchangah vawiin khan Mamit District MJA member ten Mamit SP Lalthangpuii Pulamte an hmu a. He kawng chhia avanga lirthei tlan dan tur ruahmanin zawm a hlawh tawk lo nia an hriat thu SP chu hrilhin, hmalak zui dan tur te an sawipui.

Mamit district MJA member te chuan Darlak leh Tuidam inkar kawng chhiat vanga mihring leh lirthei himna tura lirthei tlan dan tur ruahmanna July ni 1, 2024 a tih chhuahin zawm a hlawh tawk lo nia an hriat thu Mamit SP chu an hrilh a. Thupek zawm a nih ngei theihna tura duty dah turin an ngen a. He kawnga intlanchhawk dan tur ruahmanna siama thupek chhuah ni mahse, duty dah an ni lo chuan thupek zawm a hlawh loh phah nia an hriat thu Mamit dist. MJA member te chuan an sawi.

Mamit SP Lalthangpuii Pulamte chuan Darlak leh Tuidam inkar kawng chhia avanga harsatna thleng chu an lo hriat thu leh tukin dar 5 atanga duty an dah thu MJA member te chu a lo hrilh a. Tuna ruahmanna chuan awmzia a nei tam lo a nih chuan ruahmanna dang siam leh theih a nih thu pawh sawiin, "thurawn inpek tawn zel ni se" a ti.

Darlak leh Tuidam inkar kawng hi a chhiat avangin zing dar 5 atang chawhnu dar 2 thleng Tuidam atanga Darlak lam pan tur tan hawn a ni a, tlai dar 3 atanga a tuk zing dar 4 thlengin Darlak atanga Tuidam lam pan tur tan hawn thin a ni.