AMC Bye-Election ah ZPM an chak - ZPM, MNF leh Congress-in lawmthu an sawi

#ZabilianZ Aug 26: AMC Ward VI bye-election a vote tla te chu vawiin khan chhiar a ni a. ZPM candidate Pu H. Lalremtluanga"n vote 2354 hmuin, vote 2273 hmutu Independent candidate, MNF leh Congress-in an thlawp Pi Lalrinfeli chu vote 81-in a hneh.

ZPM party chuan "ZPM party chunga rinna nghata, Ward VI Corporator atâna ZPM party candidate thlang tlingtu Ward VI mipuite chungah thinlung takin lawmthu kan sawi" a ti a. Block leh unit-a an party worker te thawhrimna leh an candidate-in pekna pawh lawmawm an tih thu ZPM chuan an sawi.

Corporator atana thlan tlin tak chu a bial chhûng leh Aizawl khawpui tâna rawng a bawlna turah ZPM chuan duhsakna an hlan a. Bial mipuite tâna chhawrnahawm tak a nih an beisei thu leh chutiang tur chuan duhsakna an hlan thu an sawi bawk.#zabilianz

MPCC & MNF Joint Campaign Committee pawhin thuchhuah siamin AMC Corporation atana thlan tlin tak Pu H. Lalremtluanga an lawmpui thu an sawi a. "Aizawl khawpui leh Ward VI hmasawnna hna tluang tak leh ṭha taka thawk tur leh Ward hmasawnna tura an intiamna te tihlawhtling ngei turin duhsakna kan hlan a ni" an ti.

MPCC leh MNF candidate inṭawm, Independent candidate Pi Lalrinfeli vote tu zawng zawng te lawmthu an hrilh a. "Bye-Election campaign bulṭan aṭanga inthlan zawh thlengin party pahnih - Mizoram Pradesh Congress Committee (MPCC) leh Mizo National Front (MNF) elected office bearers' te, party pahnih campaign committee te leh party hruaitu ten a tawp thlenga min uap tlat avang te, AMC-a MPCC leh MNF Corpotator ten neitu chanchanga a tawp thlenga theihtawp an chhuahna leh inpekna zawng zawng avangin lawmthu kan sawi a ni" an ti a.#zabilianz

Ward VI chhung veng hrang hranga party pahnih hruaitute leh worker te, Aizawl North III MNF & MPCC block ten a tawp thlenga theihtawp an chhuah avang te, kan thu leh hla puanzarsak ṭhintu tualchhung media hrang hrang te, Joint campaign commitee media team, MPCC leh MNF election & legal team te, MPCC & MNF common candidate Pi Lalrinfeli tan ṭhahnemngai taka hun leh tha, sum leh pai sengtute, amah thlawptu zawng zawngte chungah lawmthu kan sawi rualin, min thlawptute duhthusam leh duhkhawp kan tlin zawhlohnaah in mi hriatthiamna kan dil a ni" tiin, Bye-Election neih chhungin mi rilru leh thinlung tihnat an nei a nih chuan ngaihdam an dil bawk.#zabilianz #zabilianznews #zofatehuapzo