Home Minister-in thu belhchiandawllo hmanga mipui rilru hruaipen tumah eptu party te a puh

#ZabilianZ Aug 12: Home Minister K. Sapdanga'n Ration Card, Assam ramri leh Airport chungchangah te thu belhchian dawllo hmanga mipui rilru hruaipen tumah eptu party te a puh a. "Mipui nuihzat leh rin loh an hlawh phah zual thei,” a ti.

ZPM party chhung inkhawm vawiina neihah he thu hi K. Sapdanga chuan a sawi a. Eptu party ten ration card chungchanga mipui hriata an sawi dan chu a dik tawk lo nia sawiin, chhungkaw khawsak ziaawm zawk ration card var hmangtu ten sorkar atanga buhfai subsidy-a an leina man tihsannaah chhungkaw harsa zawk - ration card eng (yellow) leh ration card pawl (blue) hmangtute a huam lo niin a sawi.

Supply Minister hmalaknain ration card siamthat hna kalpui mek a nih thu sawiin, K. Sapdanga chuan "chhungkaw khawsak harsa zawkte tan phurrit tur a awm lo,”a ti bawk.#zabilianz

Ramri chungchangah tunhnaiah Assam lamin an duty camp bul leimin an thianfai a, hei hi eptu party lamin mipui tihthlabar nan an hmang niin K. Sapdanga chuan a sawi a. "Hetianga thu belhchiandawllo hmanga mipui rilru an kuai peng thin hi a pawi ka ti hle" a ti a. Tunhnaiah Assam sorkar nen ramri chungchangah tha takin an inbia nia sawiin, "hmasawnna kan hmu chho mek a ni" a ti.

Airport chungchangah pawh Mizoram tana tha tur zirchian a nih chauh laiin, eptu party lamin thutlukna siamfel ta ang maiin thuthang diklo an lo vawrh darh niin K. Sapdanga chuan a sawi a. "A pawi ka ti hle a ni,” a ti bawk.#zabilianz

Home Minister chuan, sorkar tha nei tur chuan opposition party tha tak neih a ngai nia sawiin, "Zoram mipui ten eptu party tha tak min pe hi lawmawm hlein ka hria a, sorkar leh mipui tan malsawmna ropui tak an ni thei a ni" a ti a. Opposition party ten sorkar tihbuai tumin thu belhchiandawllo erawh an hmang fo nia sawiin, "hei erawh mipui nuihzat leh rin loh hlawh theihna a ni,” a ti.

K. Sapdanga chuan tunhnaia an lungkham ber chu aikal tihbo a nih thu sawiin, department tinah aikal an neih leh neih loh zawh a nih thu leh aikal titawp tura thuchhuah siam a nih thu a sawi a. Titawp lo department an awm chuan department hotu ten mawh an phur dawn niin a sawi.#zabilianz

Home Minister chuan "Aikal tihtawp avang hian mipuiin harsatna engemawchen chu kan tawk ngei dawn tih hi sorkar hotu ten an hmu tlang vek a, amaherawhchu huaisen taka ram siamthat hna kalpui a ngai a, mipui pawh kan chhel a ngai hle" a ti a. Hun a kal anga thil a la rawn inher dik mai dawn a ni" a ti.

AMC Ward VI-a bye-election tur chungchang pawh sawiin, K Sapdanga chuan "party liana kan ngaih pahnihin mal din ngam lova party naupang te ZPM beihrawn tura ruahmanna an siam hi an inhmu te hle niin ka hria" a ti a. Party liana ngaih pahnih an mal din ngam ta lo chuan mipui mak tih pawh a hlawh niin a sawi.#zabilianz

K. Sapdanga chuan he ward enkawltu Corporator John Zosangliana Ralte-in chatuan ram a pan chu pawi a tih thu leh a kalsan a chhungte a tawrhpui thu a sawi a. John Zosangliana Ralte hmalakna chhunzawm turin ZPM chuan Candidtate tha tak H. Lalremtluanga, Chanmari West an neih thu sawiin, Ward VI mipuite chu lo vote tlin sak turin a ngen bawk a ni.#zabilianz #zofatehuapzo