MPCC-in Sawhthing lei leh hralh chungchanga sorkar hmalak tumdan Sawhthing chingtute tan him lovah an ngai

#ZabilianZ Aug 12: MPCC Treasurer Dr. Lalmalsawma Nghaka'n Mizoram sorkarin Sawhthing lei leh hralh chungchanga hmalak a tumdan thenkhat chu Sawhthing chingtute tan him lova an ngaih thu leh an hahthlawnna tur ni theia an hriat thu a sawi.

MPCC Treasurer chuan vawiin khan Aizawl press club-ah thuthar thehdarhtute kawmin he thu hi a sawi a. Tunhnaiah Agriculture Minsiter leh Adviser to CM ten thlai thar lei dan tur chungchanga an thuchhuahah Sawhthing bik lei leh hralh chungchanga hmalak an tum dan thenkhat an tarlan chu tha lo an tih thu a sawi.

Mizoram mipui ten ZPM-in Sawhthing leh thlai dang lei tura an intiamna an ngai thutak hle nia sawiin, MPCC Treasurer chuan ZPM-in thlai thlan bik an tih te chu chhungkaw tam takin an ching a, a khua khua a Sawhthing ching pawh an awm niin a sawi a. "ZPM sorkarin thlai thlan bik pali - Sawhthing, Aieng, Hmarcha leh Hmunphiah man man zawka te kuthnathawktu ten an hralh theihna tura large scale cultivation ruahmnna siama, survey mumal tak neia research-based a plan mumal tak hnuaia ruahmanna siam nia an insawi chu an insawi ang a ni lo nia an hriat thu a sawi.#zabilianz

MPCC Treasurer chuan sorkar ruahmanna chu en thuak chuan ruahmanna tha awm tak nia a lan laiin zirchian chuan kuthnathawktute beidawnna thlentu mai a ni ang tih a hlauhawm thu a sawi a. Sawhthing programme bikah sorkar chuan a insawi angin ruahmanna felfai tak a siam lo nia an hriat thu a sawi.

Sawhthing chingtute tithlawntu leh tibeidawngtu ni theia an hriat te MPCC Treasurer chuan a sawi a :

1. Sawhthing Grade A leh B in then an tum a, 'Grade A' chauh Rs. 50 leh a chunglama lei tur an ti a, Grade B chu a chingtute leh a leitute inbiakremna tura an dah hi tha lo kan ti hle.#zabilianz

Mizoramah Sawhthing grade a then a nih kan hre ngai lova, an then a nih chuan grade then dan tur, a quality eng chen nge tih inkaihhruaina a awm loh bakah a leitu ten 'grade B' anga Sawhthing quality an then teuh chuan a chingtute a tuartu an ni dawn a, hei hi a thalo hle a ni.

Sawhthing leitute hian grade then dan an tih uluk viaua, an fin phakar viau chuan Sawhthing grade kha an tihniam vak thei a, grade A emaw grade B chauh emaw lei an tum thei a, chu chu ngaihtuah ngai tak a ni. Grade an then chhanah hian an duhsak bik, sorkarin Sawhthing lei tura a thlan ten hlawh uchuak zawka an sumdawn theih nan grading siam a ni em? Chuvangin a grade then lo se kan duh a ni.

2. Khawpui mi Sawhthing ching tute ta kan leisak dawn lo an ti hi thil thalo tak a ni. Khua leh tui tu pawhin Sawhthing a ching a, a chinna khua-a society ah a in register a nih chuan an leisak ngei tur a ni.

An Manifesto angin society-a in register te Sawhthing leisak hi an ba a, chutih rualin khawpui mi pawh ni se an Sawhthing chinna khuaa society ah Sawhthing a chin anga in register hi phalsak ngei tur a ni.

Khawpui atanga thingtlanga Sawhthing ching tam tak hi harsa leh rethei ve tak tak an ni a, neihthinglungkhawnga hma la ve tho an ni tih kan hriatsak a ngai a ni.#zabilianz

Sorkar hi khua leh tui te tan pa a ni angin, Sawhthing ching theuh inthliarhran hi thil dik a ni thei lova, a puitling lo zia hle a ni.

Khawpui mi Sawhthing ching te hi sorkar hian a ngaihven tur a ni a, a thlahthlam ngawt bik tur a ni lo.

Society din chungchangah society hruaitu tur te hi sorkar official te lo tawiawm tura beisei an nih laiin, khaw khata rulling party hruaitute an inruat mai niin a lang.

Sawhthing lei leh hralh hi society kaltlanga siam tur a nih dawn chuan ngaihtuahna a ti thui hle. Society hi ZPM membership fee lak nan hman tumna a awm ta mai em ni?#zabilianz

3. Tender hmanga hralh bang te hralh dan turah company te nen agreement siam ngei tur a ni, chuti lo chu kumin kumtira Hmunphiah leitu tur agreememt an siampui ang kha a nih leh a hlauhawm. Company nen tender agreement mumal takin an siam ngei tur a ni. A leitu tura agreement an neihpui te pawhin an lei leh duh loh te a awm thei a, chutiangah chuan loneitute guarantee pek ngei tur a ni a, a leitu tur te pawhin an lei ngei theih nan felfai taka agreement ziahpui turin dan awmsa hmanga hma la turin sorkar hi kan phut tlat a ni.

4. Buh leh thlai te large scale a chin dawn reng reng chuan chhan hrang hrang avanga chhiatna thleng thei laka kuthnathawktute hamthat nan engemaw tal an dawn let theihna tur Crop Insurance tih ngei ngei tur a ni.

Tuna kan sorkar mek hian Sawhting inchintir chungchangah campaign auhla ber thlai luman (crop insurance) an hmaih ta tlat mai hi a mak khawp mai. Sawhthing tam vang emaw khuarel chhiatna avang emawa kan kuthnathawktu ten thlai luman ruahmanna awm lo hi a beidawnthlak hle a ni.#zabilianz

5. Sawhthing leina tur, Minimum support price pekna tur hi a hranpain budget-ah a awm lova, Banakaih policy hnuaiah vaibelchhe 200 dah a ni a, nikuma thlai thar leina vaibelchhe 110 an dah, an la hman loh nen vaibelchhe 310 awm anga ngaih theih a ni. Sawhthing hi sawrkar chhut danin quintal nuai 10 vel Mizorama thar tura ngaih a ni a, Sawhthing thar tur sorkarin a chhut chhuah zat ngaihtuahin a beitham hle.

6. Sawhthing chawh hun chungchangah ZPM hian ruahmanna siam an tum a nih hmel a, hei hi ngaihtuah chian ngai a ni bawk. Sawhthing hi seasonal crop a ni a, a chawh hunlaia chawh loh chuan Sawhthing quality a tlahniam thei a, chuvangin thlai chingtute chawh hunbi siamsak hi a tha lova, a hralh theih hun chhunga an hralh vek theih nan ruahmanna siam turin kan phut a ni.

Thlai dang lei tura an intiam Hmunphiah, Aieng leh Hnarcha chungchanga hmalakna te hi kan la hre tlem a, heng thlai chingtute pawh hi ngaihvena, leisak ngei turin emaw, Minimum support price inthlan hmaa an intiam ang ngeia ti ngei turin kan phut tlat a ni.#zabilianz

Minimum support price-ah hian sorkar hian eng formula nge a hman dawn? Buyers tur te hi terms and conditions fel tak nen tihfel vek tawh ni sela, Sawhthing chingtute thlamuanna turin tlangzarh tawh turin kan ngen a ni.

Hmunphiah an ti zuzi ang khan tih zuzi chi a ni ve lova, namliama, 'Kan thiamloh a ni lova, nangni thiamloh pawh a ni lo, kan agent thiamloh a ni ber mai," tih ngawt chi a ni ve lo, chhungkua leh khua a nghawng tam lutuk.

ZPM hian an policy leh manifesto-a an ziah angin an kalpui ngei a ngai a, tu ta emaw leisak leh leisak duh loh te, a grade a then dawn pawhin a tirah, campaign lai emaw, an sorkar hnu pawhin, Sawhthing chin hun hma khan sawi tur ni awm tak a ni a, tuna an ti thar leh hi Sawhthing lei an intiamna thulh lehna tur kawng an zawng em ni tih hi kan zawt a, tumah thliar lovin, Sawhthing pawh a grade thliar lova leisak ngei turin sorkar kan phut tlat a ni.

Kut hnathawh hi a hahthlak a, sawhthing ching tute hian an sum leh pai, an kumkhat tha leh kum khat pumhlum an hun an seng a, hei hi sawrkar hian a tithlawn tur a ni lo. A tithlawn anih chuan sawhthing chingtute tawrhna  hi a nasa dawn lutuk a, ngaihtuah ngam pawh a ni lo a ni, tiin MPCC Treasurer chuan thuthar thehdarhtute hma-ah thlai thar lei chungchanga sorkar hmalakna chungchang te chu a sawi a ni.#zabilianz #zofatehuapzo