#ZabilianZ June 30: MPCC President Lal Thanzara'n MNF hruaitu thenkhatin thangthar te fuihpawrhin remna leh muanna tichhe zawngin thu an sawi thin niin a sawi.
Congress party-in Congress Bhavan Golden Hall-ah Remna Ni an lawman ah he thu hi vawiin khan MPCC President chuan a sawi a. "Pu Laldenga khan he inremna hi a sign tawh a, India constitution hnuaiah a intulut tawh a ni tih hria se ka duh a ni" a ti bawk.#zabilianznews
MPCC President chuan Mizoram buai hre pha lo thangthar te hnenah rambuai chungchang sawi thar a nih loh chuan politics-ah kalsual theihna a awm dawna a hriat thu a sawi a. Kum 1966 atanga Mizoram buai avanga mipuiin nasa taka an tawrh laiin kum 1967-ah Mizoramah Congress party a lo piang a, a tum ber chu remna leh muanna thlentir a nih thu a sawi.
Kum 1967-a Mizorama Congress party a lo pian laia Congress President Lal Thanhawla'n hnam pasaltha ram chhuak ten Sai ni lovin Sakhi leh Sazuk an rawn hawn a nih pawhin nunau te nen kawtchhuaha lo hmuah an nih tur thu leh a kaptu in-ah a lu an tar tur thu sawiin, remna leh muanna a tlangaupui thin niin Lal Thanzara chuan a sawi a. Kum 1986, June ni 25-ah Congress party leh MNF-in inremna an ziak a, he inremna avang hian Mizoram Peace Accord a lo piang thei ta niin a sawi.#zabilianznews
MPCC President chuan "Kum 1976-ah Union Home Secretary SL Khurana leh Pu Laldenga te khan inremna an lo ziak tawh a, mahse, kha inremna kha a hlawhchham a, a chhan chu Pu Laldenga duh ber Chief Minister nihna an ken theih loh vang a ni" a ti a. "Remna leh muanna nei tur chuan a man pek a ngai a, khatihlaia Chief Minister leh Minister te khan an nihna kha remna leh muanna a awm theih nan an kalsan a ni" a ti bawk.
Congress party chu Mizorama remna leh muanna thlentu nia sawiin, MPCC President chuan Pathian pawhin mal a sawm niin a sawi a. "Mizorama hmasawnna zawng zawng deuhthaw hi kan kutchhuak a ni" tiin, an intiamna te pawh an tihlawhtling zel niin a sawi bawk a ni.#zabilianz #zabilianznews #zofatehuapzo
0 Comments