Private hospital inzawmkhawm pawlin MUHCS package rate anga damlo ten re-imburse/bill theih chuan MUHCS an thlawp tur thu an sawi - sawrkar lamin Aizawl pawn private hospital pathum emaw chauh MUHCS la zawm lo an awm tawh niin an sawi

#ZabilianZ June 19: Mizoram-a private hospital inzawmkhawm pawl, Non-Govt. Hospital Association of Mizoram (NGHAM)-in Mizoram Universal Health Care Scheme (MUHCS) package rate angin damlo ten re-imburse/bill leh thei se MUHCS chu an pawm theih tur thu an sawi.#zabilianznews

NGHAM chuan mipui harsatna tawh tihtawp a nih theih nan sawrkar hospital ten MUHCS cashless kalpui zel se, private hospital-ah erawh phailam hospital thenkhat sawrkarin a ziahluh loh leh pawm loh (Non-empanelled hospital)-a a phalsak angin damlo ten an bill chu MUHCS package rate angin re-imburse/bill leh thei se, MUHCS chu an thlawp nghal tur thu an sawi a. Hetia tih a nih hian sawrkar pawisa a hek belh lo nia sawiin, mipui harsatna tam tak a sutkian tur thu an sawi bawk.

Non-Govt. Hospital Association of Mizoram chuan MUCHS an la zawm ve loh avangin mipuiin nasa takin harsatna an tawk tih chu an hriat thu sawiin, hrethiam hram hram turin mipui an ngen a. "MUHCS kalphungah chuan damlo ten Damdawi-In awmna bill an chawi a ngai lova, an awmna Hospital-in senso tul zawng zawng an lo tumsak anga, sawrkar-in Damdawi-In hnenah damlo enkawlna man chu a peksak dawn a. Hetiang hi chuan hospital-ah nitina pawisa lut a awm dawn lova, nitina damlo enkawlna senso a hautak tham avangin, ba ringawta damlo enkawl chu private hospital ten kan tlin lo" an ti.#zabilianznews

Health care thara damlo enkawlna man (rate) pawh tuna Mizorama private hospital-a an rate tlangpuite aiin za-a 50 atanga 80 velin a hniam zawk niin Private Damdawi in te chuan an sawi a. "Man tlawm taka damlote a ba thlau ni bawk si a enkawl tura beisei kan ni" tiin, "Mizoram-a private hospital ten damlo kan enkawlna man leh room man te hi phailama private hospital tam ber te aiin nasa takin a tlawm zawk a, chu aia tlawm leh zuala damlo enkawl chu kan dinhmunah thil theih loh tluk a ni" an ti. Hetianga man tlawma damlote an enkawl chuan an Damdawi-In ten tlakchhiat a hmabak niin an sawi bawk.

Phailama Corporate/Private Hospital, rate sang tak hmangte nen Mizoram sawrkarin MUHCS inremna an ziak thei pawh tha an tih rualin, Mizorama private hospital te tana rate an chhawpsak nen erawh a inanglo hle tih an sawi a. "MUHCS hnuaia damlo an enkawl tur te chu phai lam hospital te tan chuan tlem te chauh an nih avangin, a ba thlau (cashless) a enkawl chu an tan thil harsa a ni lova, Mizoram-a private hospital-te tan erawh damlo kan enkawl zawng zawng deuhthaw MUHCS hnuaia enkawl tur an nih dawn avangin cashless ringawt chuan enkawl an harsa dawn a ni" an ti bawk a ni.

Hetih lai hian sawrkar lam chuan Aizawl pawn lama private hospital zingah MUHCS la zawm lo pathum emaw chauh an awm tawh nia sawiin, vawiin lam khan Nazareth Hospital, Ramhlun North, Aizawl atangin MUHCS zawm an duh thu an dawng leh niin an sawi a. Niminah Faith Hospital, Lunglei nen inremna an ziak a, DM Hospital, Champhai nen pawh inremna an ziak niin an sawi. 

Mizoram Synod enkawl Durtlang Hospital leh John Williams Hospital, Lunglei ten MUHCS an zawm dawn leh dawn loh chungchang chu Synod Executive Committee-in a ngaihtuah dawn a. An ni pawh hian an zawm ngei an beisei thu sawrkar lam chuan an sawi a ni.#zabilianz #zabilianznews #zofatehuapzo