Private hospital ten cashless avanga nitin sum lut awm lo tura an ngaih chunchangah sawrkarin Rs. nuai 50 advance pek a inhuam

#ZabilianZ June 19: Mizoram State Health Care Society hotu ten private hospital intelkhawm ten cashless avanga nitin sum lut awm lo tura an ngaih chunchangah sawrkar lam chuan Rs. nuai 50 advance pek a inhuam thu an sawi a. Kartin damdawi in bill pek thin a nih thu leh an buai lo tura ngaih a nih thu an sawi bawk.

Mizorama private hospital te rate tlangpui aia MUHCS rate za-a 50-80 vela hniam zawk anga sawi pawh hriatchian loh vang nia a lan thu sawrkar chuan an sawi a. Entirna pakhat siamin, "Aizawla private damdawiin lian atanga Mizoram State Health Care Society-in kum hmasa lama claim a dawn atanga chhutin, rilphir zaina senso chawhrualin Rs. 36,250 (room luah man telin) a ni" an ti.

"MUHCS hnuaiah rilphirzai chu base rate Rs 25,000 tih ni mahse, heng damdawiin lianah hian additional incentive an dawn tur zat nena belhkhawmin rilphir zai package rate chu Rs.32,500 atanga Rs.35,000 thleng a ni thei a. Damlo chu a entitlement a zirin Cabin-ah emaw Semi Cabin-ah emaw a awm a nih chuan room man chu package rate tarlan piahlamah damdawi in in an bill belh thei a, room luah man nen chuan Rs 36,250 aiin a sang zawk dawn a ni" an ti bawk.

Phai lam hospital leh Mizoram private hospital te chu rate leh quality chungchangah te, grading chungchangah te khaikhin chi a ni lo niin sawrkar lam chuan an sawi a. Sawrkar chuan, Mizoram private hospital-te chu duat takin phai lam hospital te nen rate inangtlang a offer bakah, a piahlam pawh sawipui a la inhuam niin an sawi.

Phai lama non-empanelled hospital te reimbursement phalsak anga sawi pawh a dik ziktluak lo niin sawrkar lam chuan an sawi a. "MUCHS guidelines ang chuan emergency-ah emaw empanelled hospital ten an enkawl theihloh natna bikah phai emaw Mizoram pawh ni se non-empanelled hospital-ah reimbursement chu theih reng a ni" an ti.

Mipui nawlpui, a bikin miharsa zawk te leh sawrkar hnathawk tam tak ten damloh nikhuaa inkhul chhuahna tur sum an neih loh dan te, puk chawpa inkhul chhuak te leh mahni in leh lo hial tihral ngai khawpa mangang te an awm thin tih sawrkarin a hriatpui avangin cashless-in mipui healthcare chu kalpui a nih thu n sawi a. Hei hi sawrkar chuan mipui tan tha a ti hle niin an sawi bawk.

Sawrkar chuan mipuite hmakhawngaiin private hospital te nen inrawntlanga, dawhkan khat kilhova inbiakremna kawng zawn zel a duh thu an sawi bawk.#zabilianz #zabilianznews #zofatehuapzo