#ZabilianZ July 05: Zokhawthar ral leh lam, Tiau lui kam Khawmawi khuaa Myanmar rama mipui sipai ve ve - Chin National Defence Force (CNDF) leh Chinland Defense Force (CDF)-Hualngoram te an inkah hnuah CNDF-in CDF-Hualngoram awp china CDF camp zawng zawng luhchhuakin, an thunun tawh.
CDF-Hualngoram sipai te hi an camp 8 atangin an tlan darh tawh nia thudawn a ni a, a tam zawk chu Mizoram lamah an lut niin thudawnna chuan a sawi. Vawiin tlai dar 3 rik hma deuh khan silai puak ri pawh a reh tawh niin a sawi bawk.
He inkahna avanga thi leh hliam zat hriat theih a ni rih lova, chanchin buatsaih lai hian CDF-Hualngoram sipai pakhat ruang chu Aizawl lam thawn turin Zokhawthar YMA ten an buaipui mek nia thudawn a ni a. CDF-Hualngoram sipai hliam te Champhai damdawi in-ah leh Zokhawthar damdawi in-ah enkawl an ni. He inkahna avang hian sahimna zawngin Zokhawthar-ah mi engemawzat an tlan lut tawh niin thudawnna chuan a sawi.
Mipui sipai pawl pahnihte an inkah lai hian Tahan atanga Zokhawthar-a raltlan, Myanmar lam Khawmawi khuaa inhlawhfaa kal mipa pakhat chu vawiin khan Zokhawthar pana a let leh tur Tiau lui-ah chesualin a tla a, Zokhawthar YMA ten tui tla hi an zawng mek bawk.
Ramri-a inkahna thleng avang hian Zokhawthar mipui thlamuana, a tul anga hma la turin Zokhawthar-ah Executive Magistrate tirh nghal a nih thu Champhai Bawrhsap Mohammed Aaquib chuan a sawi a. Silpauline leh blanket engemawzat raltlan thar te hman tur pek a nih thu a sawi.
Mipui sipai pawl pahnih te hi ramria insumdawn tawnna an thuhnuaia dah duh avanga inkap nia sawi a ni a. Nizan lama an inkahnaah mi pahnih an thi a, tun thla ni 2-a an inkahnaah CDF-Hualngoram sipai pakhat a thi bawk a. Vawiina an inkahna ah hian silai mu engemawzatin Zokhawthar-a in a deng a, Zokhawthar YMA-in aurinna hmangin Zokhawthar lam hawia silai kap tawh lo turin an au hial a ni.#zabilianz #zabilianznews #zofatehuapzo
0 Comments