#ZabilianZ July 22: Dampa bialtu MLA, Max Super Speciality Hospital, Delhi-a nizana chatuan ram pan ta Lalrintluanga Sailo ruang chu vawiinah Delhi atanga rawn hawpui a ni dawn a. Zaninah lumen a ni ang a, naktuk chhun dar 12-ah Luangmual-ah vui a ni ang.
Dampa bialtu MLA ruang hi Delhi-a cham mek Home Minister K. Sapdanga'n ruang a rawn zui haw dawn a ni.
Kum 65 mi Lalrintluanga Sailo, Dampa bialtu MLA-in chatuan ram a pan tih an hriat ve leh Delhi-a cham mek - Home Minister K. Sapdanga, Lok Sabha MP Richard Vanlalhmangaiha leh Rajya Sabha MP K. Vanlalvena ten Max Super Speciality Hospital pan nghalin, Delhi Mizo Welfare te nen buaipui tul ang ang te an buaipui nghal a. Vawiina a ruang rawn hawpui hman turin tihfel ngai te tihfel a ni.#zabilianznews
Tarlan tawh angin Dampa bialtu MLA hi Lalrintluanga Sailo hi pneumonia leh scrub typhus (rannung seh) ten tlakbuakin Max Super Speciality Hospital, Delhi-ah enkawl a nih laiin nizan dar khan chatuan ram a pan a. Nizan vek khan Delhi-a cham mek Home Minister K. Sapdanga'n tawngtaia hun a hman hnu ah ruang a chhiatlohna tura sawngbawl (embalming) turin AIIMS damdawi in lam panpui nghal a ni.
Dampa bialtu MLA Lalrintluanga Sailo hi kum 2018-a MLA inthlan-ah a vawikhat nan Dampa bial atanga thlan tlin a ni a. MNF ticket-a Dampa bial atanga tling hmasaber a ni. Kum 2023 inthlanah a bial ngai-ah ding leh in a vawihnihna atan thlan tlin leh a ni a, MLA a ni mek a ni.#zabilianznews
Kum 1990-2002 ah Luangmual VCP a ni a. Hemi hnu hian Branch YMA President leh Finance Secretary te a ni zui leh a. MFA (Mizoram Football Association)-ah pawh term hnih chhung executive member a ni tawh bawk.
May ni 9, 1986 ah Lalbiakthuami nen inneiin fa panga (mipa 3 leh hmeichhe 2) an nei a ni.#zabilianz #zabilianznews #zofatehuapzo
0 Comments