#ZabilianZ July 22: Max Super Speciality Hospital, Delhi-a nizana chatuan ram pan ta Dampa bialtu MLA Lalrintluanga Sailo ruang chuan vawiin chawhnu dar 1 khan Lengpui airport a lo thleng a. Minister leh MLA bakah MNF party hruaitu engemawzatin airport-ah hian an lo dawngsawng a ni.
Airport-ah Chaplain-in hunserh a hman zawh hnuin an chenna Luangmual lam panpui nghal a ni a. Zaninah lumen a ni ang a, naktuk chhun dar 12-ah Luangmual-a an chenna In-ah vui a ni ang.#zabilianznews
Dampa bialtu MLA Lalrintluanga Sailo ruang hi sawrkar thil pawimawh ti-a Delhi-a kal Home Minister K. Sapdanga leh damlohna avanga Delhi-a inenkawla kal Serlui bialtu MLA Lalrinsanga Ralte ten an rawn zui haw a ni.
Tarlan tawh angin, kum 65 mi Lalrintluanga Sailo hi pneumonia ten a tlakbuak avangin kumin April thla khan Greenwood Hospital-ah vawihnih luhpui a ni a. HDU-a dah ngai te pawhin awm mahse, a ziaawm chho leh a. Ziaawm zel tura ngaih a nih laiin scrub typhus (rannung seh) ten a tlakbuak zui tak avangin June ni 2, 2025 khan Max Super Speciality Hospital, Delhi an pan.#zabilianznews
Hemi hnu hian lo haw lehin kar hnih vel in lama an inenkawl hnu ah June ni 29, 2025 khan Delhi an pan leh a. ICU-ah te enkawl a nih hnuin a ziaawm chho leh viaua ngaih a nih laiin July ni 19,2025 (Inrinni) tlai lam atang khan a thawhah te zualin ventilator hman ngai hialin a awm leh ta a. Ziaawm leh mai tura ngaih a nih laiin July ni 21, 2025 zan dar 9-ah chatuan ram a pan ta a ni.
Lalrintluanga Sailo, Dampa bialtu MLA-in chatuan ram a pan tih an hriat ve leh Delhi-a cham mek - Home Minister K. Sapdanga, Lok Sabha MP Richard Vanlalhmangaiha, Rajya Sabha MP K. Vanlalvena leh damlohna avanga Delhi-a kal Serlui bialtu MLA Lalrinsanga Ralte ten Max Super Speciality Hospital pan nghalin, Delhi Mizo Welfare te nen vawiin-a a ruang hawpui hman ngei tumin buaipui tul ang ang te an buaipui a ni.#zabilianznews
Dampa bialtu MLA Lalrintluanga Sailo hi kum 2018-a MLA inthlan-ah khan a vawikhat nan Dampa bial atanga thlan tlin a ni a. MNF ticket-a Dampa bial atanga tling hmasaber a ni nghe nghe. Kum 2023 inthlanah a bial ngai-ah ding leh in a vawihnihna atan thlan tlin leh niin, MLA a ni mek a. Khawtlang lamah pawh kum 1990 atanga 2002 thlengin Luangmual VCP a ni a. Hemi hnu hian Branch YMA President leh Finance Secretary te a ni zui leh a. MFA (Mizoram Football Association)-ah pawh term hnih chhung executive member a ni tawh bawk.
May ni 9, 1986-ah Lalbiakthuami nen inneiin fa panga (mipa 3 leh hmeichhe 2) an nei a ni.#zabilianz #zabilianznews #zofatehuapzo
0 Comments