Methamphetamine kg 10 chuang leh a neitu nia puh an man - ruihhlongai thenkhat vantlang hna thawhtir

#ZabilianZ July 20: Excise & Narcotics department-in nizana Methamphetamine leh a neitu nia puh an man kaihhnawihah tukin khan he thila inhnamhnawia puh dang pakhat an man belh.

Excise & Narcotics department thuchhuahin a tarlan danin, nizan dar 11 vel khan Zokhawthar panna bul, New Hruaikawn road-ah Methamphetamine kg 10 leh gram 100 (mum 10,100) leh a neitu nia puh - Lunminlalzo (34), Churachandpur, Manipur, tuna Champhai Vengthara awm nia insawi chu manin, ruihhlo phurhna atana hman car (Maruti 800) - MZ 04 - 8564 an hrensak bawk.

Tukin dar 8:45 vel khan he thila inhnamhnawia puh dang Christy Hmingthanzami (19), Champhai Vengthar nia insawi chu Champhai, Mualbawk-ah an man leh a. Methamphetamine avanga Excise & Narcotics-in an man te hi vawiin khan Court-ah hruai nghal an ni.

Excise & Narcotics Department chuan Aizawl bakah district dang khawpui hrang hrangah chhun leh zawmin ruihhlongai te vaiin beihpui an thlak a. Ruihhlongai thahnem tak chu an chhung te remtihna lain Home hrang hrangah te an dah a, thenkhat chu Court thupek angin vantlang hmun pawimawh thenfaitir an ni a. Sawrkarin ruihhlo ngai te enkawlna a buatsaih, Hulhliap Short Stay Centre for Addicts-ah te an dah bawk.#zabilianz #zabilianznews #zofatehuapzo