#ZabilianZ July 18: A thatlai hun leh a thiam leh theihna tam zawk Mizo leh Mizoram tana hmangtu, Pachhunga University College (PUC) Vice Principal hlui leh DSST (Dawrpui School of Science & Technology) Principal hmasaber Dr. S. Hom Chaudhuri chuan nimin khan chatuan ram a pan a, vawiin-ah Kolkata-ah vui a ni ang.
Kum 83 mi Dr. S. Hom Chaudhuri hian Alzheimer neiin, kum 2022-a Kolkata khawlaia a tluk sual avangin a khel ruh tliak zai a ni a. Hemi hnu hian chaklo chho hret hretin, Kolkata-a KD Cure Nursing Home-a enkawl a nih mek laiin nimin - July ni 17, 2025 chawhnu dar 1:10 khan chatuan ram a pan ta a ni.#zabilianznews
Kum 1971-ah PUC-ah thawk tanin, Education department-ah zirtirtu a ni a. PUC ramngaw tha tak ni ta hi kum 1975 atanga 'a hova NSS te hmalakna rah' tia sawi thin a ni. Kum 2003-ah PUC atangin Vice Principal-in a pension a, PUC-ah hian kum 32 chhung a thawk a ni.
PUC atanga a pension hnu kum 2004-ah Dawrpui vengin sikul an din turah thawhpuiah sawm nghalin, Dawrpui School of Science & Technology (DSST)-ah Principal hmasaber a ni a, kum 2018 thlengin he sikul-ah hian Principal a ni a. Mizoram sawrkarin Education Reforms Commission (2009-2010) a din khan Member Secretary niin, Mizorama zirna siamthat kawngah a thawhhlawk hle bawk.#zabilianznews
Kum 1978-ah K. Lalzarliani, MF&AS, (Deputy Director, Account & Treasuries) nen inneiin, a nupui hian kum 2006 khan cancer avangin kum 52 mi chauh niin chatuan ram a lo pansan tawh a ni.
A thiam leh theihna, a hun tam zawk Mizoram tana hmangtu, amah hretu Mizo tam zawkin 'Pu Hom-a' tia an hriatlar hi vawiinah Kolkata-ah vui a ni dawn a. Aizawl atang pawhin a nupui unau te leh a thawhpui thin leh a zirlai ni thin thenkhatin a vuina-a tel turin Kolkata an pan dawn. A chhung te pawhin Aizawl lam atanga kal te hi an lo nghah tur thu an sawi bawk.#zabilianz #zabilianznews #zofatehuapzo
0 Comments