Mizorama political party zingah Congress party-in hotu a nei tha ber a, sawrkarna siam leh tura hmalam nei eng ber a ni :MPYCC Sr. Vice President

#ZabilianZ July 28: Congress thalai Sr. Vice President Ngurdingpuia Pachuau-in Mizorama political party zingah Congress party-in hotu a nei tha ber nia sawiin, sawrkarna siam tura party hma lam nei eng ber niin a sawi.

Congress Bhavan, Aizawl-a party chhung inkhawm vawiina neihah he thu hi MPYCC Sr. Vice President chuan a sawi a. Congress party chu Lal Thanhawla atang tawha thutiam hlen thin, 'kan ti ang" an tih tihlawhtling thin niin a sawi bawk.

Zoram hmasawnna rahbi pawimawh te chu Congress party-in a tuk a ni deuh vek niin Ngurdingpuia chuan a sawi a. Falkawn-a Referal Hospital tur Congress sawrkar laia engkim tihfel pawh a hnu-a MNF sawrkarin chhunzawm tlak loh khawpin an sawp nia sawiin, Congress a lo sawrkar leh hnu ah tharthawh lehin medical college leh hospital changtlung takah an chhuah tih a sawi.

ZPM party chungchang sawiin, MPYCC Sr. Vice President chuan an sawrkar hmaa mipui hmaa an tiam zawng zawng te an palzut niin a sawi a. "'Kan ti ang' an tih te an ti lova, 'kan ti ve lovang' an tih te an ti leh si" tiin, mipuiin ZPM party leh an hotupa an rinna a tlahniam nasa niin a sawi bawk.#zabilianz #zabilianznews #zofatehuapzo