MNF-in an founder President thih champha-ah a pualin hun an hmang

#ZabilianZ July 07: MNF Founder President Laldenga thih champha vawi 35-na pualin tukin dar 7 khan Treasury Square, Aizawla Laldenga thlanah MNF party-in hun an hmang a. MNF President Zoramthanga'n "Pathianin Pu Laldenga min pe hi Mizote kan vanneihna lungphum pawimawh ber te zing ami a ni" a ni ti.#zabilianznews

Zoramthanga chuan Laldenga chu India ram mai ni lo, khawvela Mizo hnam pholangtu niin a sawi a.  A hunlai leh thangthar zel te thlenga an thinlunga hnam thinlung (nationalism) tuhtu nia sawiin, "sawisela ngaihnep tum awm thin mahse, kan finna a sang tulh tulh a, Pu Denga hlutna hi kan hrechiang chho tulh tulh a, Mizo hnam leh Mizoram a awm chhung chuan Pu Laldenga hming a dai tawh lovang" a ti bawk.

Laldenga fanu Dr. Renee Lalrinzuali pawhin chhungkaw aiawha thusawiin, a pa hriatrengna hun hmangtu zawng zawng lawmthu a hrilh a. "Ka pa khan Mizoram hi a lo va hmangaih em ve aw, ka ti thin" tiin, "Khang hun zawng zawngah khan kan chhungkua aiin Mizoram leh hnam a dah hmasa zawk thin a. Mizoram tan a nih chuan keini kha min hlan hreh lo hialin ka hria" a ti. "Mizoram a hmangaihnaah a tum a thlen dawn chuan a nupui fanaute chu pahnihnaah min dah zawk thin a ni," a ti bawk.#zabilianznews

Laldenga thih champha ah hian MNF President leh hruaitu dang ten Laldenga thlanah hian pangpar dahin, Laldenga zahna chibai an buk a ni.

MNF Founder President Laldenga kha July ni 11, 1927-ah Lunglei Pukpui khuaah a piang a, kum 1944-ah British Indian Army a zawm a. Kum 1959-ah Mizo National Famine Front chu a hova din niin, chu pawl chu October ni 22, 1961-ah Mizo National Front (MNF) tia thlak a ni.#zabilianznews

1986 ah Mizoram sawrkar lailawk (interim)-ah Chief Minister a ni a, kum 1987-a Mizoram State Assembly inthlan hmasaberah Sateek leh Aizawl North-II bial atanga thlan tlin niin, state nih hnua Chief Minister hmasaber a ni.

Kum 1990-ah Cancer a ni tih hriat a ni a, USA-ah thla thum enkawl a nih hnuin, Mizoram pana an haw kawngah Ashford Hospital, London-ah July ni 7, 1990, India sanaa chawhnu dar 2:30-ah a thi a. July ni 11, 1990 tlai dar 4:30-ah a ruangin Tuirial Airfield a thleng a. July ni 13, 1990-ah vui niin, Mizote zinga sawrkar chawimawina famkim - state funeral-a vui awmchhun a la ni.#zabilianz #zabilianznews #zofatehuapzo