#ZabilianZ Aug 18: MNF President Zoramthanga'n MNF sawrkar laia peace bonus leh MNF sulhnute sawinep tum an awm ṭhin nia sawiin, "MNF sulhnute kha sawinep theih a ni lo, record awm vek leh a taka hmuh theih vek a ni" a ti.
Vawiina MNF party chhung inkhawmah he thu hi MNF President chuan a sawi a. "MNF-in development a din pahnih chauh sawilang ta ila, sipai ramluah chhuhsaka MINECO kan din leh Lunglei World Bank road ringawt pawh hi a nep loh zia mipuiin an hria a ni," bawk.
Chief Minister hlui chuan, "Kum 1998-a MNF-in sawrkarna a siam khan Mizoram sawrkar sum dinhmun kha a chhe takzet a. Leiba tam tham takin min delh a ni" tiin, Congress sawrkara Finance Minister ngeiin sawrkar sum dinhmun chhiat zia chu a sawi niin a sawi a. "Delhi-a Finance Ministry nen kan han en a, 'Peace Bonus' tia hming phuahin Mizoram chhanchhuahna tur sum kan dil ta a. India rama ram buai ber ni ṭhin kha a ralmuang berah kan ṭang ta a, chumi pual chuan peace bonus chu kan dil ta a ni," Zoramthanga chuan a ti.
Peace Bonus chu vaibelchhe 175 an dil thu Chief Minister hlui chuan sawiin, "kan dil aia tam daih, kan ba rulhna daih tur law law vaibelchhe 182.45 min pe ta a ni" a ti a. "Hetih laia kan plan budget zatve thuak min pe kha a ropui takzet a ni," tiin, "Peace Bonus leh MNF hnathawh ropui tak tak te kha sawinep tum awm ṭhin mahse, kan sawi ve zel dawn a, MNF sawrkar-in hmasawnna hna a thawh nasat zia kha a hrechiangtute chu Zoram mipuite an ni," a ti bawk.#zabilianz #zabilianznews #zofatehuapzo
0 Comments